सुनिल तुगनायत ,सिटी हब मिडिया वणी…
शहरात आणि परिसरात सुरू असलेल्या अवैध मद्यविक्रीला आळा घालण्यासाठी वणी पोलिसांनी सलग दोन स्वतंत्र कारवाया करत दोन जणांविरुद्ध महाराष्ट्र दारूबंदी कायद्यान्वये गुन्हे नोंदविले आहेत. या दोन्ही कारवायांमध्ये देशी दारूचा साठा जप्त करण्यात आला असून संबंधित आरोपींवर कायदेशीर कारवाई सुरू करण्यात आली आहे.
पहिल्या घटनेत, लालपुलिया-चिखलगाव परिसरात पोलिसांनी संशयित व्यक्तीची तपासणी केली असता त्याच्या ताब्यातील प्लास्टिक पिशवीमध्ये विक्रीसाठी ठेवलेली देशी दारू आढळून आली. पोलिसांनी केलेल्या पाहणीत ९० मिली क्षमतेचे २० पव्वे जप्त करण्यात आले. जप्त मद्याची अंदाजे किंमत ८०० रुपये असल्याचे सांगण्यात आले. याप्रकरणी माळीपुरा येथील अभिनय सुनील गोलाईत (वय २५) याच्याविरुद्ध महाराष्ट्र दारूबंदी कायदा कलम ६५ (ई) अंतर्गत गुन्हा दाखल करण्यात आला आहे. या प्रकरणाचा तपास पोलीस हवालदार निलकमल भोसले करीत आहेत.
दरम्यान, दुसऱ्या कारवाईत वणी पोलिसांचे पथक नियमित गस्त घालत असताना मिळालेल्या गोपनीय माहितीच्या आधारे भालर रोडवरील लालगुडा चौपाटी परिसरात छापा टाकण्यात आला. तेथे एक व्यक्ती कोणत्याही परवान्याशिवाय देशी दारूची विक्री करत असल्याचे आढळून आले. पोलिसांनी ताब्यात घेतलेल्या नायलॉन पिशवीतून ९० मिली क्षमतेच्या १७ देशी दारूच्या बाटल्या जप्त करण्यात आल्या. या मुद्देमालाची किंमत ६८० रुपये असल्याची माहिती पोलिसांनी दिली.
या कारवाईत नंदू उर्फ लक्की संभाजी मेश्राम (वय ३४, रा. जुना लालगुडा, वणी) याला ताब्यात घेण्यात आले असून त्याच्याविरुद्धही महाराष्ट्र दारूबंदी कायदा कलम ६५ (ई) अन्वये गुन्हा नोंदविण्यात आला आहे.
अवैध मद्यविक्रीविरोधात सुरू असलेल्या मोहिमेअंतर्गत अशा प्रकारच्या कारवाया यापुढेही सुरू राहणार असल्याचे पोलिस सूत्रांनी सांगितले आहे.
