एसपीएम शाळेजवळील मोकळ्या मैदानावर सुरू होता मृत्यूचा व्यापार; ५ ग्रॅमहून अधिक घातक ‘एमडी’ ड्रग्जसह २ तरुणांना बेड्या!

सुनिल तुगनायत, सिटी हब मिडिया वणी…

वणीत स्थानिक गुन्हे शाखेचा धडक ऐवज; दीड लाखांच्या मुद्देमालासह ‘एमडी’ ड्रग्ज विकणारे दोन तरुण जाळ्यात!

यवतमाळ‌ जिल्ह्यात अवैध व्यवसायांचे समूळ उच्चाटन करण्यासाठी आणि अंमली पदार्थांच्या छुप्या विक्रीला चाप लावण्यासाठी यवतमाळ पोलीस दलाने कंबर कसली आहे. जिल्हा पोलीस अधीक्षक श्री. कुमार चिंता यांच्या आदेशानुसार स्थानिक गुन्हे शाखेने (LCB) धडक कारवाई करत **वणी** पोलीस स्टेशनच्या हद्दीत अमली पदार्थांची विक्री करणाऱ्या दोन तरुणांना रंगेहात अटक केली आहे. त्यांच्याकडून तब्बल **१,६३,०७० रुपये** किमतीचा मुद्देमाल जप्त करण्यात आला आहे.

गुप्त माहितीवरून रचला सापळा…

यवतमाळ जिल्ह्यामध्ये तरुण पिढीला नशेच्या आहारी ढकलणाऱ्या ‘एमडी’ (Mephedrone/Methadone) या सिंथेटिक ड्रग्जची विक्री होत असल्याची गोपनीय माहिती गुन्हे शाखेला मिळाली होती. या पार्श्वभूमीवर वणी उपविभागातील गुन्हे शाखेचे पथक गस्तीवर असताना, त्यांना एका खबरीने खात्रीशीर माहिती दिली. वणी येथील ‘एसपीएम’ शाळेच्या मागच्या बाजूला असलेल्या नगर परिषद शाळा क्र. ३ समोरील मोकळ्या मैदानावर दोन इसम ड्रग्ज विकण्यासाठी आले असल्याची माहिती पथकाला मिळाली.

दोन आरोपींना अटक, मुद्देमाल जप्त…

माहिती मिळताच पोलिसांनी तात्काळ घटनास्थळी धाव घेऊन दोन संशयितांना ताब्यात घेतले. त्यांच्याजवळ एक निळ्या रंगाची मोपेड दुचाकी (क्र. MH 29 CD 5776) होती. पोलिसांनी त्यांची झडती घेतली असता, त्यांच्याकडे **०५ ग्रॅम ९१ मिलिग्रॅम** ‘एमडी’ (Methadone) हा घातक अमली पदार्थ आढळून आला, ज्याची किंमत **४१,३७० रुपये** आहे.

**अटक करण्यात आलेल्या आरोपींची नावे:**

१. **सौरभ दिनेश खैरे** (वय २५ वर्ष, रा. तेली फैल, वणी)

२. **प्रथमेश विनोद गुंडेवार** (वय २० वर्ष, रा. भाग्यशाली नगर, दीपक चौपाटी, वणी)

या कारवाईत ड्रग्जसह रोख रक्कम, मोबाईल फोन आणि दुचाकी असा एकूण १ लाख ६३ हजार ७० रुपयांचा मुद्देमाल जप्त करण्यात आला आहे. दोन्ही आरोपींवर वणी पोलीस ठाण्यात **NDPS** (अंमली पदार्थ विरोधी कायदा) अंतर्गत गुन्हा दाखल करण्यात आला असून पुढील तपास सुरू आहे.

पोलीस पथकाची कामगिरी…

ही यशस्वी कारवाई यवतमाळचे पोलीस अधीक्षक श्री. कुमार चिंता, अप्पर पोलीस अधीक्षक अशोक थोरात आणि सतीश चवरे यांच्या मार्गदर्शनाखाली, स्थानिक गुन्हे शाखेचे पोलीस निरीक्षक यांच्या समवेत भानुदास पिदुरकर यांच्या नेतृत्वात पार पडली. कारवाईत सहायक पोलीस निरीक्षक दत्ता पेंढकर, पोलीस कर्मचारी सुनील खंडागळे, सुधीर पांडे, सलमान शेख, रजनीकांत मडावी आणि नरेश राऊत यांनी महत्त्वाची भूमिका बजावली.

अशा घटनांवरून पालकांनी आता अधिक सतर्क होण्याची गरज आहे. आपली मुले कोणाच्या संगतीत आहेत, त्यांच्याकडे अचानक पैसे कुठून येतात किंवा त्यांच्या वागण्यात काही बदल झाला आहे का, यावर पालकांनी बारीक लक्ष ठेवणे गरजेचे झाले आहे. केवळ पोलिसांच्या कारवाईवर अवलंबून न राहता सामाजिक स्तरावर जागृती होणे काळाची गरज बनली आहे.