सुनिल तुगनायत, सिटी हब मिडिया वणी…
वणी नगरपरिषद निवडणुकीत भारतीय जनता पक्षाला निर्विवाद आणि एकहाती बहुमत मिळवून देण्यात मोलाचा वाटा उचलणारे भाजपचे जिल्हा उपाध्यक्ष श्री. रवींद्रजी बेलूरकर यांच्या खांद्यावर पक्षाने आता आणखी एक मोठी जबाबदारी सोपवली आहे. आगामी मारेगाव नगरपंचायत निवडणुकीसाठी त्यांची ‘निवडणूक प्रमुख’ (प्रभारी) म्हणून अधिकृत घोषणा करण्यात आली आहे.
भाजपा यवतमाळ जिल्हाध्यक्ष ॲड. प्रफुल्ल चौहान यांनी या नियुक्तीचे अधिकृत पत्र जारी करत बेलूरकर यांच्यावर हा नवा विश्वास दाखवला आहे.
संघटन कौशल्याची पावती…
रवी बेलूरकर यांची पक्षात असलेली निष्ठा, मजबूत संघटनात्मक बांधणी, सातत्यपूर्ण जनसंपर्क आणि सामान्य कार्यकर्त्यांना सोबत घेऊन चालण्याची त्यांची कार्यशैली लक्षात घेऊनच त्यांच्याकडे ही महत्त्वपूर्ण धुरा देण्यात आली आहे. वणी नगरपरिषदेत त्यांनी रचलेला विजयाचा पॅटर्न आता मारेगावमध्येही पक्षाला यश मिळवून देईल, असा विश्वास जिल्हा नेतृत्वाने व्यक्त केला आहे.
“रवींद्रजी बेलूरकर यांच्या नेतृत्वाखाली स्थानिक पातळीवर पक्ष अधिक बळकट होईल आणि ते जनतेचे प्रश्न प्रभावीपणे मांडून या जबाबदारीला पूर्ण न्याय देतील, यात शंका नाही.”- ॲड. प्रफुल्ल चौहान (जिल्हाध्यक्ष, भाजपा, यवतमाळ)
पक्षाला मोठ्या यशाची खात्री…
वणीतील ऐतिहासिक कामगिरीनंतर कार्यकर्त्यांमध्ये प्रचंड उत्साह आहे. आता मारेगाव नगरपंचायतीवरही भाजपचा झेंडा फडकवण्याचे मोठे आव्हान आणि जबाबदारी बेलूरकर यांच्या रणनीतीवर अवलंबून असणार आहे. या नियुक्तीनंतर यवतमाळ जिल्हा भाजप कार्यकारिणीसह राजकीय वर्तुळातून त्यांच्यावर शुभेच्छांचा वर्षाव होत आहे.
