सुनिल तुगनायत सिटी हब मिडिया वणी…
वेकोली वणी एरिया अंतर्गत येणाऱ्या कोळगाव-मुंगोली कोळसा खाणींमुळे परिसरातील नागरिकांना अनेक गंभीर समस्यांना सामोरे जावे लागत आहे. या समस्या वारंवार प्रशासनाच्या निदर्शनास आणूनही वेकोली प्रशासनाकडून जाणीवपूर्वक दुर्लक्ष केले जात असल्याने, लोकशाही मार्गाने ९ जुलै २०२६ रोजी सकाळी १०:३० वाजता कोळगाव चेक पोस्ट जवळ तीव्र ‘रस्ता रोको’ आंदोलन करण्यात येणार आहे, असा इशारा माजी जिल्हा परिषद सदस्य विजय पिदुरकर यांनी प्रशासनाला दिलेल्या निवेदनातून दिला आहे.
या संदर्भात माजी जि.प. सदस्य विजय पिदुरकर यांच्या नेतृत्वाखाली मा. उपविभागीय अधिकारी (महसूल विभाग, वणी) यांना अधिकृत निवेदन सादर करण्यात आले आहे. या आंदोलनाला स्थानिक लोकप्रतिनिधी, कोळगावच्या ग्रामपंचायत प्रशासक सौ. शुभांगी संदीप जेणेकर, साखराचे ग्रा.पं. सदस्य श्री. निखिल उपासे, आणि शिवणी (जा.) चे ग्रा.पं. सदस्य श्री. विश्वास बोरपे यांच्यासह स्थानिक नागरिकांचा थेट पाठिंबा व प्रत्यक्ष सहभाग असणार आहे.
वेकोलीच्या निष्काळजीपणामुळे नागरिक त्रस्त…
निवेदनात नमूद केल्याप्रमाणे, मुंगोली-कोळगाव कोळसा खाण उत्खनन आणि अवजड वाहतुकीमुळे परिसरातील रस्त्यांची अत्यंत दुरवस्था झाली आहे. विना टार्पोलिंग होणारी कोळसा वाहतूक, प्रलंबित जमीन अधिग्रहण, प्रकल्पग्रस्तांना कंत्राटी कामात रोजगार न मिळणे, प्रदूषण आणि सांडपाण्याची समस्या यामुळे स्थानिक नागरिक, शेतकरी, शेतमजूर आणि विद्यार्थ्यांचे जीणे असह्य झाले आहे. रस्त्यांवरील खड्ड्यांमुळे अनेक अपघात होऊन काहींना अपंगत्व आले आहे, तर काहींना आपले प्राण गमवावे लागले आहेत. वेकोली केवळ आर्थिक फायद्यासाठी कोळसा उत्पादनावर लक्ष केंद्रित करत असून, नागरिकांच्या सुरक्षेकडे पूर्णपणे दुर्लक्ष करत असल्याचा आरोप पिदुरकर यांनी केला आहे.
प्रमुख १२ मागण्यांसाठी एल्गार:
आंदोलकांकडून प्रशासनासमोर खालील प्रमुख मागण्या ठेवण्यात आल्या आहेत:
१. प्रमुख जिल्हा मार्ग कोळगाव चेक पोस्ट ते कोळगाव फाटा पर्यंतच्या नादुरुस्त रस्त्याची तातडीने दुरुस्ती करणे.
२. कोळगाव पुनर्वसन ते जोड रस्ता दुरुस्त करणे.
३. कोळगाव फाटा ते भीमनगर मुंगोली रस्त्याचे खडीकरण व मजबुतीकरण करणे.
४. मुंगोली-कोळगाव कंत्राटी कामात बेरोजगार स्थानिक तरुणांना रोजगारात प्राधान्य देणे.
५. मुंगोली-शिवणी रस्त्यावरील पुलाचे पिचिंग करणे व शिवणी गावापर्यंत १०० मीटर रस्ता मजबूत करणे.
६. साखरा ते रेल्वे अंडर पास १७ दरम्यानच्या रस्त्यावर पाणी मारून धूळ नियंत्रित करणे.
७. कोळगाव पैनगंगा पूल साखरा ते मुंगोली पूल नागरिकांसाठी सुरक्षित व स्वतंत्र रस्ता तयार करणे.
८. साखरा ते रेल्वे अंडर पास १७ दरम्यान मुख्य रस्त्यावर गतिरोधक, स्ट्रीटलाईट आणि रेडियम पोल लावणे.
९. वर्धा नदीवरील नवीन मुंगोली पुलावर स्ट्रीटलाईट लावणे.
१०. कोळगाव-मुंगोली खाण परिसरात पर्यावरणास घातक ठरलेली ‘प्रोसीफिस बाभूळ’ समूळ नष्ट करणे.
११. पैनगंगा मुंगोली खाणीतील कोळसा वाहनांसाठी सुरक्षित पार्किंग व्यवस्था निर्माण करणे.
१२. मुंगोली पुनर्वसन येथील प्रकल्पग्रस्तांचे गट नं. ४६, ४८ शिवणी चिंचोली अधिग्रहणात सामावून घेणे.
याशिवाय साखरा रेल्वे अंडरपास, कैलासनगर, मुंगोली चेकपोस्ट आणि शिवणी येथे स्ट्रीटलाईट लावणे व साचलेला चिखल-पाणी साफ करण्याची मागणीही करण्यात आली आहे.
…तर आंदोलन सुरूच राहणार!
“जोपर्यंत या न्याय्य आणि रास्त मागण्यांसंदर्भात वेकोली प्रशासन व महसूल विभाग ठोस निर्णय घेत नाही, तोपर्यंत ९ जुलै रोजी होणारे रस्ता रोको आंदोलन मागे घेतले जाणार नाही,” असा इशारा विजय पिदुरकर आणि स्थानिक ग्रामपंचायत सदस्यांनी दिला आहे. या निवेदनाच्या प्रती जिल्हाधिकारी यवतमाळ, महाप्रबंधक वेकोली (वणी एरिया), उपविभागीय अभियंता (सार्वजनिक बांधकाम विभाग, वणी), आणि पोलीस निरीक्षक (शिरपूर) यांना माहिती व योग्य कार्यवाहीसाठी पाठवण्यात आल्या आहेत.
