सुनिल तुगनायत, सिटी हब मिडिया वणी…
चाकूचा धाक दाखवत एका व्यक्तीला धमकावल्याच्या तक्रारीनंतर वणी पोलिसांनी तातडीने कारवाई करत एका तरुणाकडून धारदार लोखंडी चाकू जप्त केला. या प्रकरणी आरोपीविरुद्ध आर्म्स ॲक्टअंतर्गत गुन्हा दाखल करण्यात आला असून पुढील तपास सुरू आहे.
पोलिसांनी दिलेल्या माहितीनुसार, १८ जुलै २०२६ रोजी सकाळी सुमारे ९ वाजताच्या सुमारास गोकुळ नगर येथील रहिवासी ख्वाब अली खान यांनी वणी पोलीस ठाण्यात तक्रार दाखल केली. तक्रारीत सोहेल मोहम्मद गनी (वय २०), रा. रंगनाथ नगर, वणी हा त्यांच्या घरी येऊन हातातील चाकू दाखवत धमकावत असल्याचे नमूद करण्यात आले होते.
तक्रार प्राप्त होताच पोलीस उपनिरीक्षक शुभम मारोती महानवर यांनी सहकाऱ्यांसह घटनास्थळी धाव घेतली. प्राथमिक चौकशीदरम्यान परिसरातील एका महिलेनेही आरोपी चाकू घेऊन आल्याची माहिती पोलिसांना दिली.
यानंतर पोलिसांनी आरोपीच्या घराची तपासणी केली असता घरासमोरील कुंड्यांमध्ये लपवून ठेवलेला धारदार लोखंडी चाकू आढळून आला. घटनास्थळी उपस्थित महिलेनेही जप्त करण्यात आलेला चाकू हाच आरोपीकडे असल्याची ओळख पटवून दिली.
जप्त करण्यात आलेल्या चाकूची एकूण लांबी २९ सेंटीमीटर, तर त्यावरील धारदार ब्लेडची लांबी १८.०७ सेंटीमीटर असल्याचे तपासात स्पष्ट झाले. या शस्त्राद्वारे गंभीर स्वरूपाची दुखापत किंवा जीवघेणा हल्ला होऊ शकतो, असे पोलिसांनी नमूद केले आहे. तसेच संबंधित शस्त्र बाळगण्यासाठी आवश्यक परवाना मागितला असता आरोपी कोणताही वैध परवाना सादर करू शकला नाही.
पंचांसमक्ष चाकू जप्त करून सोहेल मोहम्मद गनी याच्याविरुद्ध आर्म्स ॲक्ट १९५९ च्या कलम ४ व २५ अन्वये गुन्हा नोंदविण्यात आला असून, वणी पोलीस या प्रकरणाचा अधिक तपास करीत आहेत.(बातमीत एआई इमेज वापरली आहे…)
