सुनिल तुगनायत, सिटी हब मिडिया वणी…
राजधानी दिल्लीतील जंतर-मंतर परिसरात आंदोलनकर्त्यांवर करण्यात आलेला अमानुष लाठीचार्ज आणि लोकसभेतील विरोधी पक्षनेते राहुल गांधी यांच्याशी करण्यात आलेले अनुचित वर्तन या घटनांचे तीव्र पडसाद वणीत उमटले आहेत. या दोन्ही घटनांच्या विरोधात वणी तालुका व शहर काँग्रेस कमिटीच्या संयुक्त विद्यमाने स्थानिक शिवाजी चौक येथे एकदिवसीय धडक धरणे आंदोलन छेडण्यात आले. आंदोलनानंतर उपविभागीय अधिकाऱ्यांच्या माध्यमातून देशाच्या राष्ट्रपतींना मागण्यांचे निवेदन पाठवण्यात आले.
निवेदनाद्वारे प्रमुख मागण्या:
सखोल चौकशी: जंतर-मंतर येथील लाठीमार प्रकरणाची निष्पक्ष चौकशी करून दोषी पोलिसांवर कडक कारवाई करावी.
घटनात्मक अधिकार: नागरिकांच्या शांततापूर्ण मार्गाने आंदोलन करण्याच्या लोकशाही अधिकारांचे रक्षण व्हावे.
विरोधी पक्षनेत्यांचा सन्मान: मा. राहुल गांधी यांच्यासोबत घडलेल्या गैरवर्तनाची चौकशी करून जबाबदारांवर कारवाई केली जावी.
विद्यार्थ्यांच्या मागण्या: NEET परीक्षा पेपरफुटीविरोधात आवाज उठवणाऱ्या विद्यार्थ्यांच्या रास्त मागण्या तातडीने मंजूर कराव्यात.
‘लोकशाही मूल्यांची पायमल्ली’ — विकेश पानघाटे
आंदोलनादरम्यान बोलताना वणी तालुका काँग्रेस अध्यक्ष विकेश पानघाटे म्हणाले, “शांततापूर्ण मार्गाने न्याय मागणे हा लोकशाहीने प्रत्येक नागरिकाला दिलेला घटनात्मक अधिकार आहे. आंदोलकांवर बळाचा वापर करणे आणि संसदीय परंपरांचा अवमान करत विरोधी पक्षनेत्यांशी गैरवर्तन करणे ही थेट लोकशाही मूल्यांची पायमल्ली आहे. या हुकूमशाही प्रवृत्तीचा आम्ही तीव्र शब्दांत निषेध करतो.”
लोकप्रतिनिधी व कार्यकर्त्यांची मोठी उपस्थिती..
शिवाजी चौकातील या आंदोलनात काँग्रेसचे प्रदेश सचिव संजय खाडे, शहर अध्यक्ष जय आबड, देविदास काळे, प्रमोद वासेकर, डॉ. कावडे, मोरेश्वर पावडे, रुपेश ठाकरे, टिकाराम कोंगरे, वंदना आवारी, रवींद्र होकम, अफसर शेख, सुधीर खंडाळकर, मोरेश्वर वासेकर, फरीद शेख, राजू अंकतवार, सुरज पुल्लेवार, तेजराज बोढे, राजू काळे, भास्कर वासेकर, अनंत डुंबारे, पांडुरंग पंडिले, डॉ. महेंद्र लोढा, जयसिंग गोहोकार, रवींद्र कांबळे, श्यामा तोटावार, मनीष खाडे, अशोक चिकटे, पलाश बोढे, रोहित मालेकर, वंदना धगडी, सविता रासेकर, प्रेम मेश्राम, प्रेम मंगाम, अनिल भोयर, विजय मालेकर, अशोक नागभीडकर, भास्कर आत्राम, नंदकिशोर अंबोरे, पुंडलिक गुंजेकर, सुरेखा वडीचार, अल्का मोवाडे यांच्यासह अनेक पदाधिकारी, कार्यकर्ते व नागरिक मोठ्या संख्येने सहभागी झाले होते.
तीव्र आंदोलनाचा इशारा…
शासन व प्रशासनाने या प्रकरणाची गांभीर्याने नोंद न घेतल्यास आणि दोषींवर लवकरात लवकर कारवाई न केल्यास येणाऱ्या काळात काँग्रेस पक्ष लोकशाही मार्गाने याहून अधिक तीव्र संघर्ष करेल, असा इशाराही यावेळी पक्षाच्या वतीने देण्यात आला.
