सुनिल तुगनायत, सिटी हब मिडिया वणी…
नाव नोंदणी व हरकतींसाठी ३० सप्टेंबर २०२६ पर्यंत मुदत; काही मतदान केंद्रांचे स्थलांतर व एकत्रीकरण…
विशेष सखोल पुनरीक्षण कार्यक्रम-२०२६ अंतर्गत ७६-वणी विधानसभा मतदारसंघाची प्रारूप मतदार यादी ३१ ऑगस्ट २०२६ रोजी प्रसिद्ध करण्यात आली आहे. या प्रारूप यादीमध्ये मतदारसंघातील २३ हजार ६६९ मतदारांची नावे समाविष्ट करण्यात आलेली नाहीत. संबंधित मतदारांना मतदार यादीत आपले नाव नोंदवण्यासाठी ३० सप्टेंबर २०२६ पर्यंत अंतिम संधी देण्यात आली आहे, अशी माहिती उपविभागीय अधिकारी तथा मतदार नोंदणी अधिकारी यांनी दिली आहे.
डिजिटायझेशन न झाल्याने नावे वगळली…
वणी विधानसभा मतदारसंघातील एकूण २ लाख ७९ हजार ९७२ मतदारांपैकी २ लाख ५६ हजार ३०३ मतदारांच्या ‘इन्युमरेशन फॉर्म्स’चे (Enumeration Forms) डिजिटायझेशन पूर्ण झाले आहे. मात्र, उर्वरित २३ हजार ६६९ मतदारांचे फॉर्म्स वेळेत प्राप्त न झाल्याने अथवा उपलब्ध न झाल्याने त्यांचे डिजिटायझेशन होऊ शकले नाही. त्यामुळे ३१ ऑगस्ट २०२६ रोजी प्रसिद्ध करण्यात आलेल्या प्रारूप मतदार यादीत या मतदारांच्या नावांचा समावेश करण्यात आलेला नाही.
संबंधित मतदार प्रत्यक्षात मतदारसंघात त्यांच्या नोंदणीकृत पत्त्यावर वास्तव्यास असल्यास, त्यांनी ३१ ऑगस्ट ते ३० सप्टेंबर २०२६ या कालावधीत आवश्यक कागदपत्रांसह ‘नमुना-६’ (Form-6) भरून मतदार यादीत नाव नोंदणीसाठी अर्ज करावा, असे आवाहन प्रशासनाने केले आहे.
२९ ऑक्टोबरपर्यंत हरकतींवर निर्णय…
प्रारूप मतदार यादीतील कोणत्याही नोंदीबाबत दावे व हरकती ३० सप्टेंबर २०२६ पर्यंत स्वीकारल्या जाणार आहेत. प्राप्त दावे व हरकतींची नियमानुसार सखोल तपासणी करून आवश्यक सुनावणी घेतली जाईल आणि त्यावर २९ ऑक्टोबर २०२६ पर्यंत अंतिम निर्णय घेण्यात येईल.
पाच मतदान केंद्रांचे स्थलांतर; तिघांचे एकत्रीकरण…
विशेष सखोल पुनरीक्षण कार्यक्रमांतर्गत मतदान केंद्रांचे सुसूत्रीकरण करण्यात आले असून काही केंद्रांमध्ये बदल करण्यात आले आहेत:
केंद्रांचे स्थलांतर: पूर्वी नगर परिषद शाळा क्र. २ येथे असलेली मतदान केंद्र क्र. ११३, ११५, ११६, ११७ आणि ११८ ही इमारत दिवाणी न्यायालय (वरिष्ठ स्तर) यांच्याकडे हस्तांतरित करण्यात आल्यामुळे, ही पाचही मतदान केंद्रे आता जनता विद्यालय, वणी येथे स्थलांतरित करण्यात आली आहेत.
केंद्रांचे एकत्रीकरण: मतदार संख्या ३०० पेक्षा कमी असल्याने केंद्र क्र. ६४ व ६५ (राproject/राproject ईजारा – राजूर ईजारा), केंद्र क्र. २३८ व २३९ (तरोडा) तसेच केंद्र क्र. २५६ व २५७ (झरी-जामणी) या केंद्रांचे एकत्रीकरण करण्यात आले आहे.
या बदलांमुळे वणी विधानसभा मतदारसंघातील एकूण मतदान केंद्रांची संख्या ३४१ वरून आता ३३८ इतकी झाली आहे.
नागरिकांना प्रशासनाचे आवाहन…
मतदार यादी अधिक अचूक, अद्ययावत व पारदर्शक करणे हा या मोहिमेचा मुख्य उद्देश आहे. पात्र नागरिकांनी आपले नाव प्रारूप मतदार यादीत असल्याची खात्री करावी. नाव नसल्यास किंवा काही दुरुस्ती असल्यास मुदतीपूर्वी नमुना-६ अथवा संबंधित दावा/हरकत अर्ज दाखल करून या प्रक्रियेत सक्रिय सहभाग घ्यावा, असे आवाहन उपविभागीय अधिकारी तथा मतदार नोंदणी अधिकारी, ७६-वणी विधानसभा मतदारसंघ यांनी केले आहे.
