सुनील तुगनायत, सिटी हब मीडिया, वणी:
वणी-वरोरा राज्यमार्गावरील झोला फाटा परिसरात बुधवारी दुपारी एका भरधाव कारने दुचाकीला मागून दिलेल्या जोरदार धडकेत दोन जणांचा दुर्दैवी मृत्यू झाला. या भीषण अपघातात मानकी येथील अनिल कुत्तरमारे यांचा जागीच मृत्यू झाला, तर वांजरी येथील प्रदीप ठमके यांनी रुग्णालयात उपचार सुरू असताना प्राण सोडले. या घटनेमुळे संपूर्ण परिसरात शोककळा पसरली आहे.
नेमकी घटना काय?
मिळालेल्या माहितीनुसार, मानकी येथील रहिवासी अनिल बाबाराव कुत्तरमारे (वय ४०) आणि वांजरी येथील बांधकाम मिस्त्री प्रदीप रमेश ठमके (वय ३१) हे दोघेही बुधवारी दुपारी १२:३० च्या सुमारास आपल्या स्प्लेंडर दुचाकीने (MH 29 BQ 9635) वणीकडून वरोऱ्याच्या दिशेने शेंबळ येथे जात होते.
पाटाळा पुलाजवळील झोला फाट्यापाशी मागून अत्यंत वेगाने येणाऱ्या पांढऱ्या रंगाच्या स्विफ्ट कारने (MH 14 GD 6835) त्यांच्या दुचाकीला मागून जोरदार धडक दिली. धडक इतकी भीषण होती की, अनिल कुत्तरमारे यांचा जागीच मृत्यू झाला. या अपघातानंतर कारवरील नियंत्रण सुटल्याने कार रस्त्याखाली ३-४ कोलांटउड्या मारत शेतात जाऊन कोसळली.
कुटुंबावर कोसळला दुःखाचा डोंगर…
अनिल कुत्तरमारे: या अपघातात जागीच प्राण गमवावे लागलेले अनिल कुत्तरमारे यांच्या पश्चात आई, पत्नी, एक मुलगा आणि एक मुलगी असा परिवार आहे. त्यांच्या निधनाने कुटुंबाचा मुख्य आधार हरपला आहे.
प्रदीप ठमके: गंभीर जखमी अवस्थेत प्रदीप ठमके यांना वरोरा येथील रुग्णालयात दाखल करण्यात आले होते, मात्र तिथे त्यांची प्राणज्योत मालवली.
इतर जखमी: कारमधील दोन प्रवासी देखील गंभीर जखमी असून त्यांच्यावर उपचार सुरू आहेत.
कार चालकावर गुन्हा दाखल…
याप्रकरणी मृत अनिल कुत्तरमारे यांचे भाऊ सुनील बाबाराव कुत्तरमारे यांच्या फिर्यादीवरून वणी पोलीस ठाण्यात कार चालक अमोल मलकापुरे (रा. मारेगाव) याच्याविरुद्ध गुन्हा नोंदवण्यात आला आहे. पोलिसांनी भारतीय न्याय संहितेच्या (BNS) खालील कलमान्वये कारवाई केली आहे:
कलम १०६ (१): निष्काळजीपणामुळे मृत्यूस कारणीभूत ठरणे.
कलम २८१: सार्वजनिक रस्त्यावर बेदरकारपणे वाहन चालवणे.
कलम १२५ (A) व १२५ (B): जीव धोक्यात टाकून गंभीर दुखापत करणे.
मदतकार्य आणि पोलीस तपास
अपघातानंतर स्थानिक नागरिकांनी तातडीने मदतकार्य राबवले. अनिल कुत्तरमारे यांचा मृतदेह ‘सागर वंजारी’ यांच्या रुग्णवाहिकेने वणी ग्रामीण रुग्णालयात शवविच्छेदनासाठी पाठवला. वणी पोलीस स्टेशनच्या मपोहेका/१२४५ अंजली चिखले या प्रकरणाचा सविस्तर तपास करत आहेत.
बेदरकारपणे वाहन चालवणाऱ्या चालकांमुळे निष्पाप जीवांना आपले प्राण गमवावे लागत असल्याने संताप व्यक्त होत आहे.
