सुनिल तुगनायत, सिटी हब मिडिया वणी…
शहरालगतच्या गणेशपूर परिसरातील मंगलमूर्ती पार्क येथे एका नोकरीनिमित्त बाहेर गेलेल्या व्यक्तीच्या बंद घराचे कुलूप तोडून अज्ञात चोरट्यांनी लाखो रुपयांचे सोन्याचे दागिने लंपास केले आहेत. या धाडसी चोरीमुळे परिसरात खळबळ उडाली असून पोलिसांनी अज्ञात आरोपीविरुद्ध गुन्हा दाखल केला आहे.
नेमकी घटना काय?
मिळालेल्या माहितीनुसार, फिर्यादी रामरतन सिताराम हरडे (५९), रा. मंगलमूर्ती पार्क, प्लॉट क्र. ४२, हे वेकोलि (WCL) मध्ये नोकरीला आहेत. दि. २१ एप्रिल रोजी संध्याकाळी ४ वाजेच्या सुमारास ते आपल्या घराला कुलूप लावून ड्युटीवर गेले होते. हीच संधी साधत अज्ञात चोरट्यांनी त्यांच्या घराच्या दरवाजाचे कुलूप तोडून आत प्रवेश केला.
दि. २२ एप्रिल रोजी दुपारी ३ वाजेच्या सुमारास चोरीचा हा प्रकार उघडकीस आला. चोरट्यांनी घरातील कपाटाचे कुलूप तोडून आतील मौल्यवान दागिने चोरून नेले.
चोरीला गेलेला मुद्देमाल:
चोरट्यांनी घरातून एकूण ७६ ग्रॅम सोन्याचे दागिने लंपास केले असून त्याची बाजारपेठीय किंमत सुमारे २ लाख ३० हजार रुपये आहे. यात खालील वस्तूंचा समावेश आहे:
४० ग्रॅम वजनाच्या सोन्याच्या दोन बांगड्या (किंमत १,२०,०००/- रु.)
२० ग्रॅम वजनाचा सोन्याचा गोप (किंमत ६०,०००/- रु.)
१० ग्रॅम वजनाच्या दोन सोन्याच्या अंगठ्या (किंमत ३०,०००/- रु.)
६ ग्रॅम वजनाचे कानातील सोन्याचे लटकन (किंमत २०,०००/- रु.)
पोलीस तपास सुरू…
रामरतन हरडे यांच्या तक्रारीवरून वणी पोलिसांनी भारतीय न्याय संहिता (BNS) च्या कलम ३३१ (३), ३३१ (४) आणि ३०५ (a) अन्वये अज्ञात आरोपीविरुद्ध गुन्हा नोंदवला आहे. या प्रकरणाचा पुढील तपास पोलीस उपनिरीक्षक साजिद सैय्यद हे करत आहेत.
काही महिन्यांपूर्वी वणी व आसपासच्या परिसरात घरफोडीचे सत्र सुरू होते व पोलिसांच्या प्रयत्नांमुळे त्यावर आळा बसला होता परंतु आता या घटनेमुळे परत एकदा घरफोडीचे सत्र सुरू तर होणार का अशी भिती नागरिकांमध्ये निर्माण होऊ शकते त्यासाठी पोलिसांनी वेळीच या प्रकारणाचा छडा लावून नागरिकांना दिलासा दिला पाहिजे…
दिवसाढवळ्या वस्तीत झालेली ही चोरी पाहता, नागरिकांनी आपल्या घराच्या सुरक्षिततेबाबत अधिक सतर्क राहण्याचे आवाहन पोलीस प्रशासनाकडून करण्यात आले आहे.
