सुनिल तुगनायत, सिटी हब मिडिया वणी…
येथील निर्गुडा नदीच्या सती घाट परिसरात आज सकाळी एका व्यक्तीचा मृतदेह आढळल्याने संपूर्ण शहरात खळबळ उडाली आहे. मारुती नामदेव पिपराडे (वय ५२) असे मृत व्यक्तीचे नाव असून, ते वणीतील गुरुनगर येथील रहिवासी असल्याची माहिती समोर आली आहे.
नेमकी घटना काय?
आज सकाळी ९:३० वाजेच्या सुमारास वणी पोलिसांना माहिती मिळाली की, निर्गुडा नदीच्या किनारी सती घाट जवळ एका अज्ञात व्यक्तीचा मृतदेह पडलेला आहे. माहिती मिळताच पोलिसांनी तात्काळ घटनास्थळी धाव घेतली. पोलिसांनी घटनास्थळाचा पंचनामा करून मृतदेह ताब्यात घेतला आणि उत्तरीय तपासणीसाठी (Post-mortem) वणी येथील ग्रामीण रुग्णालयात पाठवला.
ओळख कशी पटली?
मृतदेहाची झडती घेतली असता, त्यांच्याजवळ असलेल्या आधार कार्डवरून त्यांची ओळख पटली. मृत व्यक्तीचे नाव मारुती नामदेव पिपराडे असून ते स्थानिक गुरुनगर भागातील रहिवासी असल्याचे स्पष्ट झाले.
पोलिस तपास सुरू…
मारुती पिपराडे यांचा मृत्यू नेमका कसा झाला, याबाबत अद्याप संभ्रम आहे. त्यांनी नदीत उडी मारून आत्महत्या केली की पाय घसरून पडल्याने त्यांचा मृत्यू झाला, या दिशेने वणी पोलीस अधिक तपास करत आहेत. या घटनेमुळे गुरुनगर परिसर आणि सती घाट परिसरात हळहळ व्यक्त केली जात आहे.
अधिक माहिती मिळताच बातमी अपडेट केली जाईल…
