सुनिल तुगनायत, सिटी हब मिडिया वणी…
आज १ मे, महाराष्ट्र राज्य स्थापना दिन, जागतिक कामगार दिन आणि तथागत गौतम बुद्ध यांची जयंती अर्थात बुद्ध पौर्णिमा. या त्रिधारा संगमाच्या निमित्ताने वणी नगरपरिषदेच्या प्रभाग क्रमांक १३ चे काँग्रेस नगरसेवक सैफुर मोबीन रहेमान यांनी समस्त वणीकर नागरिकांना आणि आपल्या प्रभागातील जनतेला हार्दिक शुभेच्छा दिल्या आहेत.
सामान्यांच्या प्रश्नांना सभागृहात मिळणार वाचा…
महाराष्ट्र दिनाचे औचित्य साधून नगरसेवक सैफुर मोबीन रहेमान यांनी वणीकरांशी संवाद साधताना एक महत्त्वाचे आश्वासन दिले. “मी केवळ लोकप्रतिनिधी म्हणून नाही, तर जनतेचा सेवक म्हणून काम करत आहे,” असे सांगत त्यांनी भविष्यात प्रभाग क्रमांक १३ सोबतच संपूर्ण वणी शहर सुंदर आणि विकसित करण्यावर भर दिला. गोरगरीब आणि सामान्य जनतेचे जे प्रलंबित प्रश्न आहेत, ते नगरपालिकेच्या सभागृहात हिरीरीने मांडून त्यांना मार्गी लावण्यासाठी आपण कटीबद्ध असल्याचे त्यांनी आवर्जून नमूद केले.
कामगारांना न्याय मिळवून देण्यासाठी कटिबद्धता…
प्रभाग क्रमांक १३ मध्ये प्रामुख्याने कामगार वर्गाचे मोठ्या प्रमाणावर वास्तव्य आहे. जागतिक कामगार दिनाचे महत्त्व विशद करताना सैफुर मोबीन रहेमान म्हणाले की, “माझा प्रभाग हा कष्टकऱ्यांचा प्रभाग आहे. कामगारांच्या घामाला योग्य दाम आणि त्यांच्या कुटुंबाला न्याय मिळवून देणे हे माझे प्राथमिक कर्तव्य आहे.” कामगारांच्या आरोग्य, सुरक्षा आणि मूलभूत सुविधांच्या समस्या सोडवण्यासाठी आपण नेहमीच त्यांच्या पाठीशी खंबीरपणे उभे राहू, अशी ग्वाही त्यांनी यावेळी दिली.
बुद्धांच्या विचारांतून सर्वसमावेशक विकासाचा संकल्प…
अहिंसेचा आणि शांतीचा संदेश देणाऱ्या तथागत गौतम बुद्धांच्या जयंतीनिमित्त त्यांनी वणीकरांना मंगलमय शुभेच्छा दिल्या. बुद्धांच्या ‘बहुजन हिताय, बहुजन सुखाय’ या तत्त्वाचा अंगीकार करून आपण प्रभागात कार्य करणार असल्याचे त्यांनी सांगितले. कुठल्याही जाती-धर्माचा भेदभाव न करता, सर्वांच्या प्रश्नांना समान न्याय देण्याचा आपला मानस असून, समाजातील शेवटच्या घटकापर्यंत विकास पोहोचवणे हेच आपले ध्येय असल्याचे त्यांनी स्पष्ट केले.
राजकारण बाजूला सारून विकासाला प्राधान्य…
प्रभागातील रखडलेली कामे आणि जनतेच्या समस्या सोडवताना कुठलाही अडथळा येऊ नये, यासाठी त्यांनी एक महत्त्वपूर्ण पाऊल उचलले आहे. “प्रभागाचा विकास हा माझ्यासाठी राजकारणापेक्षा मोठा आहे,” असे सांगत त्यांनी स्पष्ट केले की, जनतेच्या हितासाठी ते पक्षांतर्गत किंवा राजकीय मतभेद बाजूला सारून सर्वांच्या सहकार्याने काम करतील. प्रभागातील विकासकामांचा वेग वाढवण्यासाठी ते सर्व स्तरावर प्रयत्नशील राहतील, असा विश्वास त्यांनी व्यक्त केला आहे.
जनतेसाठी सदैव उघडे असणारे ‘लोकदरबार’
नगरसेवक सैफुर मोबीन रहेमान यांची ओळख एक ‘सर्वसामान्यांत वावरणारा लोकप्रतिनिधी’ अशी आहे. त्यांनी आवर्जून सांगितले की, त्यांच्या घराचे आणि कार्यालयाचे दरवाजे जनतेसाठी २४ तास उघडे आहेत. प्रभागातील नागरिक आपल्या समस्या घेऊन त्यांना कधीही, कोणत्याही संकोचाशिवाय भेटू शकतात. सामान्यांच्या अडीअडचणीत धावून जाणारा आणि त्यांच्यात मिसळून राहणारा लोकप्रतिनिधी म्हणून ते वणीकरांच्या सेवेत अहोरात्र कार्यरत आहेत.
