सिटी हब मिडिया वणी…
वणी नगरपालिका निवडणुकीत शिवसेना शिंदे गटाला नवी ऊर्जा पालकमंत्री संजय राठोड यांच्या वणी दौऱ्याची शक्यता…
आगामी नगरपालिका निवडणुकीच्या पार्श्वभूमीवर वणी शहरातील राजकारणात मोठी हालचाल दिसत आहे. यवतमाळ जिल्ह्याचे पालकमंत्री आणि वरिष्ठ शिवसेना (शिंदे गट) नेते संजय राठोड यांच्या वणी दौऱ्याची प्रबळ शक्यता व्यक्त केली जात आहे. या दौऱ्यामुळे स्थानिक पातळीवर पक्षाला मोठी चालना मिळणार असल्याचे मानले जात आहे.
शिवसेना शिंदे गटाचे विजय चोरडिया संघटन मंत्री झाल्यापासून वणीमध्ये पक्ष विस्ताराच्या हालचालींना वेग आला आहे. त्यांच्या सातत्यपूर्ण प्रयत्नांमुळे कार्यकर्त्यांमध्ये नवीन उत्साह निर्माण झाला असून अनेक नवीन कार्यकर्ते आणि नागरिक शिवसेनेत दाखल होत आहेत. यामुळे वणीतील शिवसेनेची ताकद दिवसेंदिवस वाढताना दिसत आहे.
या सर्व प्रक्रियेला दिशा देण्यासाठी माजी आमदार विश्वास नांदेकर यांच्या मार्गदर्शनाखाली संघटन अधिक मजबूत करण्याचे काम सुरू आहे.
याच पार्श्वभूमीवर संघटनाला आणखी वेग देण्यासाठी पालकमंत्री संजय राठोड यांचा वणी दौरा प्रस्तावित आहे. जिल्ह्यात शिंदे गटाची ताकद वाढवण्याची मोठी जबाबदारी राठोड यांच्या खांद्यावर असल्यामुळे त्यांची वणी भेट अत्यंत महत्त्वाची ठरणार आहे.
राठोड यांच्या संभाव्य दौऱ्यामुळे शिवसेना शिंदे गटाच्या कार्यकर्त्यांमध्ये नवचैतन्य निर्माण होईल, तसेच आगामी निवडणुकीच्या रणधुमाळीत पक्षाला मजबूत दिशा मिळेल, असे राजकीय विश्लेषकांचे मत आहे. महायुती विरुद्ध महायुती अशा रंगतदार वातावरणात हा दौरा शिवसेनेसाठी ‘संजीवनी’ ठरू शकतो.
