सिटी हब मिडिया वणी…
वणी नगरपरिषद निवडणूक : भाजपचे बूथ व्यवस्थापन ठरेल निर्णायक, संघटनाची भक्कम टीम विजय ‘साकारणार’
आगामी नगरपरिषद निवडणुकीत भाजपने बूथ स्तरावरची मजबूत बांधणी अधिक प्रभावी करण्यावर भर दिला असून, मायक्रो मॅनेजमेंटच्या जोरावर विजय साकारण्याचा निर्धार केला आहे. भाजपचे शहराध्यक्ष निलेश चौधरी यांच्या नेतृत्वाखाली सुरू असलेल्या संघटनात्मक तयारीत 49 बूथप्रमुख, 11 शक्तिप्रमुख आणि नव्याने नियुक्त 62 बूथ प्रमुख अशी भक्कम टीम मैदानात उतरली आहे.
चौधरी यांनी सांगितले की, ही संपूर्ण टीम पूर्ण निष्ठा आणि समर्पित भावनेने भाजपच्या विजयासाठी काम करत आहे. बूथ ते शहर अशा सर्व स्तरांवरचे समन्वयित नियोजन ही निवडणुकीतील महत्त्वाची ताकद ठरणार आहे.
भाजपचे वरिष्ठ नेते, माजी आमदार संजीव रेड्डी बोदकुरवार, माजी नगराध्यक्ष तारेंद्र बोर्डे, तसेच इतर पदाधिकारी प्रचारात सक्रिय असून, ते नगरसेवक आणि नगराध्यक्ष पदाच्या उमेदवारांसह वणीच्या प्रत्येक गल्लीबोळात प्रत्यक्ष भेटी घेत आहेत. मतदारांना विकासाच्या भक्कम आश्वासनासह भाजपला साथ देण्याचे आवाहन ते सातत्याने करत आहेत.
भाजपचे बूथनिहाय अचूक नियोजन आणि सततचा संपर्क हा पक्षाचा महत्त्वाचा विजय मंत्र आहे. अलीकडील बिहार निवडणुकीत ठळकपणे दिसलेले मायक्रो मॅनेजमेंट मॉडेलच वणी नगरपरिषद निवडणुकीत लागू होत असल्याचे पक्षाकडून सांगितले जात आहे. प्रत्येक बूथवर कार्यकर्त्यांची सज्जता, मतदारांशी संवाद आणि मतदानासाठी प्रेरणा या सर्व बाबी पक्षाला वाढलेले बळ देत आहेत.
निलेश चौधरी यांच्या नेतृत्वाखालील नवीन टीमने वणीच्या सर्वांगीण विकासाचा ध्यास घेत प्रचाराला वेग दिला आहे. वणीचा विकास सक्षमपणे आणि नियोजनबद्ध रितीने करण्याची क्षमता फक्त भाजपकडेच असल्याचा संदेशही मतदारांपर्यंत पोहोचवला जात आहे.
यावेळची निवडणूक चुरशीची होणार असल्याचे संकेत स्पष्ट असून, बूथ स्तरावरील प्रभावी व्यवस्थापनामुळे वणीतील निवडणुकीत भाजपचे पारडे अधिक मजबूत होताना दिसत आहे.
