सिटी हब मिडिया वणी…
यवतमाळ जिल्ह्यातील वणी तालुक्यात राज्यातील पहिले ‘अमृत माहिती केंद्र’ कार्यान्वित…
महाराष्ट्रात प्रथमच सुरू होणारे ‘अमृत माहिती केंद्र’ वणी तालुक्यात कार्यान्वित झाले असून, या महत्त्वाकांक्षी उपक्रमाचा उद्घाटन सोहळा आज मोठ्या उत्साहात पार पडला. पाध्ये गल्ली, शिवाजी आखाड्याजवळील कार्यालयात आयोजित कार्यक्रमात अमृतचे व्यवस्थापकीय संचालक मा. श्री. विजयजी जोशी यांच्या हस्ते केंद्राचे औपचारिक उद्घाटन करण्यात आले.
या प्रसंगी अमरावती विभागीय व्यवस्थापक श्री. प्रवीण कोळेश्वर, यवतमाळ जिल्हा व्यवस्थापक श्री. परिक्षीत शर्मा, उपव्यवस्थापक श्री. कामेश राखे, श्री. ऋषिकेश कथलकर, अमृत मित्र श्री. गिरीश जोशी यांच्यासह विविध क्षेत्रांतील मान्यवरांची उपस्थिती होती. स्थानिक नागरिक, विद्यार्थी, सामाजिक संस्था व शासकीय अधिकारी मोठ्या संख्येने सहभागी झाल्याने कार्यक्रमाला उत्साहाचे वातावरण लाभले.
ग्रामीण व शहरी भागातील नागरिकांना शासकीय योजना, विविध प्रमाणपत्रे व दस्तऐवज प्रक्रिया, प्रशिक्षण संधी, रोजगार मार्गदर्शन, उद्योजकता विकास तसेच तंत्रज्ञान व संशोधनाशी संबंधित माहिती एकाच ठिकाणी उपलब्ध व्हावी, या उद्देशाने ‘अमृत माहिती केंद्रा’ची स्थापना करण्यात आली आहे. आधुनिक डिजिटल साधनसामग्रीच्या माध्यमातून सेवा अधिक सुलभ, पारदर्शक आणि वेळेत मिळाव्यात, असा या केंद्राचा मुख्य हेतू आहे.
उद्घाटन समारंभाचे नियोजन, आकर्षक सजावट व व्यवस्थापन यामुळे कार्यक्रम विशेष लक्षवेधी ठरला. यावेळी उपस्थित मान्यवरांनी ‘अमृत माहिती केंद्र’ हा उपक्रम नागरिकांसाठी मार्गदर्शक ठरेल, असा विश्वास व्यक्त करत या अभिनव संकल्पनेचे कौतुक केले.
उद्घाटन कार्यक्रमाच्या समारोपप्रसंगी अमृत मित्र अमित उपाध्ये आणि आयनेट सिस्टीमचे संचालक ॲड. परितोष पानट यांनी उपस्थित सर्वांचे आभार मानून सहकार्याबद्दल कृतज्ञता व्यक्त केली.
