सिटी हब मिडिया वणी…
वणी येथील पत्रकार व शेतकरी रवी ढुमणे (वय ५३) यांच्या आत्महत्येप्रकरणी आत्महत्येपूर्वी लिहिलेली डायरी समोर आल्याने प्रकरणाला गंभीर वळण मिळाले असून संपूर्ण तालुक्यात खळबळ उडाली आहे. या डायरीतील सुसाईड नोटच्या आधारे मृत पत्रकाराच्या मुलाने वणी पोलिस ठाण्यात तक्रार दाखल केली आहे.
तक्रारीनुसार, रवी ढुमणे हे आर्थिक अडचणीत सापडले होते. कर्जबाजारीपणामुळे त्यांनी स्वतः खरेदी केलेली शेती विकण्याचा निर्णय घेतला होता. मात्र या व्यवहारात विक्की नामक व्यवसायीने विश्वासघात करून फसवणूक केल्याचा गंभीर आरोप तक्रारीत करण्यात आला आहे.
डायरीतील नोंदींनुसार, शेती व्यवहार प्रत्यक्षात पूर्ण न करता संबंधित व्यवसायीने संगनमताने बँकांमधून मृत पत्रकार व त्यांच्या पत्नीच्या नावावर मोठ्या प्रमाणात कर्ज उचलल्याचे नमूद आहे. त्यानंतर बँकांकडून नोटिसा येऊ लागल्याने आणि वाढत्या कर्जाच्या ताणामुळे रवी ढुमणे यांना प्रचंड मानसिक त्रास सहन करावा लागल्याचेही डायरीत स्पष्टपणे लिहिले आहे.
आपण कधीही कर्ज घेतले नसताना आपल्या नावावर कर्ज दाखवण्यात आल्याने मानसिक तणाव वाढत गेला आणि या छळाला कंटाळून आत्महत्येचा निर्णय घेतल्याचा उल्लेख सुसाईड नोटमध्ये आहे. विशेषतः विक्की नामक व्यवसायीमुळे आपल्याला मानसिक त्रास झाला असल्याचे त्यांनी नमूद केले आहे.
या तक्रारीसोबत आत्महत्येपूर्वी लिहिलेल्या डायरीच्या पानांच्या झेरॉक्स प्रती तसेच काही डिजिटल पुरावे पोलिसांकडे सादर करण्यात आले आहेत. या प्रकरणाची माहिती वरिष्ठ पोलिस अधिकाऱ्यांनाही देण्यात आली असून, सखोल चौकशीची मागणी करण्यात आली आहे.
या घटनेमुळे वणी तालुक्यात संतापाची भावना पसरली असून, पोलिस पुढील तपास कोणत्या दिशेने करतात याकडे सर्वांचे लक्ष लागले आहे.
