नायगाव बसस्टॉपजवळ भरधाव दुचाकीची धडक; वृद्ध महिलेला जागीच मृत्यू
सिटी हब मिडिया वणी…
वणी तालुक्यातील नायगाव (खु) येथे भरधाव व निष्काळजी दुचाकीमुळे झालेल्या भीषण अपघातात एका वृद्ध महिलेचा जागीच मृत्यू झाल्याची दुर्दैवी घटना घडली. हा अपघात शुक्रवारी सायंकाळी नायगाव बसस्टॉप परिसरात घडला.
या प्रकरणी तुळशीराम पुंडलिक तुराणकर (वय ४१, व्यवसाय – शेती, रा. नायगाव खु.) यांनी वणी पोलीस ठाण्यात फिर्याद दाखल केली आहे. फिर्यादी यांच्या सासू मंगला अशोक मिलमिले (वय अंदाजे ५५, रा. नवीन वाघदरा, ता. वणी) या वणीहून वरोरा मार्गावरून ऑटोने नायगाव येथे उतरल्या होत्या. बसस्टॉपकडे जाण्यासाठी त्या रस्ता ओलांडत असताना वरोरा कडून वणीकडे येणाऱ्या MH-29-CK 1372 क्रमांकाच्या लाल रंगाच्या पल्सर दुचाकीने त्यांना जोरदार धडक दिली.
दुचाकी चालकाने वाहन अतिवेगात व निष्काळजीपणे चालविल्याने हा अपघात झाल्याचे फिर्यादीत नमूद आहे. धडकेनंतर मंगला मिलमिले यांच्या डोक्याला गंभीर मार लागला असून मोठ्या प्रमाणात रक्तस्राव झाल्याने त्यांचा घटनास्थळीच मृत्यू झाला.
या घटनेची नोंद वणी पोलीस ठाण्यात कलम 281, 106(1) BNS अंतर्गत करण्यात आली आहे. घटनेचा पुढील तपास पोलीस हवालदार राजु देठे (बॅ. नं. 2251) करत असून आरोपी दुचाकी चालकाचा शोध सुरू आहे.
नायगाव परिसरात वारंवार होणाऱ्या अपघातांमुळे नागरिकांमध्ये तीव्र संताप व्यक्त होत असून, या मार्गावर वाहतूक नियंत्रण व सुरक्षिततेच्या उपाययोजना तातडीने राबवाव्यात, अशी मागणी होत आहे.
