सिटी हब मिडिया वणी…
वणी नगरपालिका निवडणूक 2025 मध्ये प्रभाग क्रमांक 9 मधून अपक्ष उमेदवार म्हणून निवडणूक लढवलेल्या अब्दुल हफीज अब्दुल सत्तार उर्फ टापू यांनी तब्बल 200 पेक्षा अधिक मतांच्या फरकाने दणदणीत विजय मिळवला आहे. अनेक प्रस्थापित पक्षांच्या उमेदवारांना पराभूत करत टापू यांनी हा विजय मिळवला असून, हा निकाल वणी शहराच्या राजकीय वर्तुळात मोठ्या चर्चेचा विषय ठरला आहे.
टापू यांचे मतदान चिन्ह ‘बाल्टी (बकेट)’ होते. जनतेने आपल्या मतांच्या जोरावर ही बाल्टी पूर्णपणे भरून टापू यांच्यावर विश्वास व्यक्त केला. विजयानंतर टापू यांनी प्रभागातील जनतेचे मनःपूर्वक आभार मानले. “जनतेच्या समस्या म्हणजेच माझ्या वैयक्तिक समस्या आहेत. त्या सोडवण्यासाठी मी नेहमी तत्पर राहीन. जनता मला कधीही भेटू शकते,” अशी ग्वाही त्यांनी दिली.
प्रभागातील मूलभूत सुविधा, रस्ते, पाणीपुरवठा, स्वच्छता यांसह विविध प्रश्नांसाठी प्रशासनाकडे सातत्याने पाठपुरावा केला जाईल. प्रशासनाने दखल न घेतल्यास प्रसंगी आंदोलनाचा मार्गही स्वीकारला जाईल, असे ठाम मत त्यांनी व्यक्त केले. सर्व समाज व सर्व धर्मातील जनतेने दिलेले प्रेम व विश्वास हेच आपले बळ असल्याचे सांगत, हे ऋण आपण नक्कीच फेडू, असा विश्वास टापू यांनी व्यक्त केला.
प्रचाराच्या काळात प्रभाग क्रमांक 9 मधील निवडणूक चुरशीची ठरली होती. विद्यमान आमदारांच्या काही वादग्रस्त वक्तव्यांनंतर टापू यांच्या प्रचाराला अधिक गती मिळाली आणि शेवटी त्यांनी विजयाची फिनिशिंग लाईन गाठली. या विजयामुळे प्रभाग क्रमांक 9 मधील जनतेला आता विकासाची नवी दिशा मिळेल, असा विश्वास व्यक्त केला जात आहे.
विजयानंतर टापू यांच्या समर्थकांनी एकच जल्लोष केला. फटाक्यांची आतषबाजी करत आनंद व्यक्त करण्यात आला. अनेक मान्यवर व नागरिकांनी त्यांना पुढील वाटचालीसाठी शुभेच्छा दिल्या. विशेषतः शेख समीर शेख रफीक, खुर्शीद हुसैन आबिद हुसैन, राजुभाऊ अडकिने आणि सैयद शाहरुख यांनी अब्दुल हफीज अब्दुल सत्तार उर्फ टापू यांना विजयाच्या हार्दिक शुभेच्छा देत त्यांच्या कार्याची प्रशंसा केली.
टापू यांना निवडून आणण्यात त्यांच्या समर्थक व कार्यकर्त्यांचा मोठा वाटा असून, त्यांनी दिवस-रात्र एक करून घरोघरी जाऊन प्रचार केला. मतदारांनी दिलेल्या भरघोस प्रतिसादामुळे हा विजय शक्य झाला, असे मत कार्यकर्त्यांनी व्यक्त केले. एकूणच, प्रभाग क्रमांक 9 मधील हा निकाल वणी नगरपालिका निवडणूक 2025 मधील महत्त्वाचा व लक्षवेधी निकाल ठरला आहे.
