सिटी हब मिडिया वणी…
बांगलादेशात हिंदू अल्पसंख्यांकांवर होत असलेली हिंसा, हत्या आणि तेथील प्रशासनाची निष्क्रियता याच्या निषेधार्थ वणीत तीव्र आंदोलन करण्यात आले.
शनिवारी २७ डिसेंबर रोजी शहरातील छत्रपती शिवाजी महाराज चौकात भारतीय जनता पार्टी, राष्ट्रीय स्वयंसेवक संघ, बजरंग दल व विविध हिंदुत्ववादी संघटनांच्या वतीने बांगलादेशविरोधात आंदोलन करून आक्रोश व्यक्त करण्यात आला.
यावेळी भारतीय जनता पार्टीचे माजी आमदार संजीव रेड्डी बोदकुरवार यांनी बांगलादेशात हिंदूंवर होत असलेल्या अत्याचारांविरोधात आक्रमक भूमिका घेतली.
ते म्हणाले, “मी जरी राष्ट्रीय पक्षाचा माजी आमदार असलो, तरी माझ्या रक्ता-रक्तात हिंदुत्व भिनलेले आहे. जोपर्यंत हिंदू बांधव एकत्र येत नाहीत, तोपर्यंत बांगलादेशसारखे अत्याचार थांबणार नाहीत. राजकारणाची चपला-जोडे बाहेर ठेवून एक हिंदू म्हणून एकत्र येण्याची हीच वेळ आहे.”
भारताचे पंतप्रधान नरेंद्र मोदी असून देशात हिंदू सुरक्षित असल्याचे त्यांनी नमूद केले. मात्र पाकिस्तान आणि बांगलादेशात हिंदूंवर मोठ्या प्रमाणावर अत्याचार होत असल्याने त्याविरोधात आवाज उठविणे ही आपली जबाबदारी असल्याचे सांगत त्यांनी बांगलादेश सरकारचा तीव्र निषेध केला.
यावेळी उपस्थितांनी “जय जय श्रीराम”, “वंदे मातरम्” अशा घोषणांनी परिसर दणाणून सोडला. हिंदूंवरील अत्याचार थांबविण्यात आले नाहीत, तर भविष्यात अधिक तीव्र आंदोलन छेडण्यात येईल, असा इशाराही आंदोलनकर्त्यांनी दिला.
या आंदोलनात माजी आमदार संजीव रेड्डी बोदकुरवार, कल्याण पांडे, प्रशांत भालेराव, ॲड. प्रशांत पाठक, अनुराग काठेड, निलेश कटारिया, नितीन वासेकर, तुकाराम माथनकर, लक्ष्मण उरकुडे, अंकुश बोढे, लहुजी खामनकर, लोभेश्वर टोंगे, अजिंक्य शेंडे, संतोष लक्षेट्टीवार यांच्यासह विविध हिंदूनिष्ठ संघटनांचे कार्यकर्ते मोठ्या संख्येने उपस्थित होते.
