सिटी हब मिडिया वणी…
पोलीस वर्धापन दिनाच्या निमित्ताने वणी पोलीस स्टेशन, जिल्हा यवतमाळ यांच्या वतीने समाजप्रबोधन व कायदेविषयक जनजागृतीचा व्यापक उपक्रम राबविण्यात आला. या उपक्रमाच्या माध्यमातून विद्यार्थ्यांमध्ये कायद्याबाबत जागरूकता निर्माण करण्यावर विशेष भर देण्यात आला.
या उपक्रमांतर्गत इंटरनॅशनल ब्लॅक डायमंड स्कूल, आदर्श हायस्कूल, विवेकानंद विद्यालय, ज्ञानदा स्पर्धा परीक्षा केंद्र तसेच आंबेडकर चौक येथील अभ्यासिका वणी येथील शाळा व कोचिंग क्लासेस येथे पोलीस अधिकारी व कर्मचाऱ्यांनी भेटी दिल्या. तसेच आदर्श हायस्कूल, भगतसिंग चौक येथील विद्यार्थ्यांना वणी पोलीस स्टेशनमध्ये प्रत्यक्ष भेट देण्यासाठी आमंत्रित करण्यात आले होते.
यावेळी विद्यार्थ्यांना पोलीस स्टेशनचे दैनंदिन कामकाज, तक्रार नोंदविण्याची प्रक्रिया, गुन्ह्यांच्या तपासाची कार्यपद्धती तसेच आपत्कालीन परिस्थितीत पोलीसांची भूमिका याबाबत सविस्तर माहिती देण्यात आली. यासोबतच महिला विषयक कायदे, सायबर गुन्हे, गुड टच–बॅड टच, बालसुरक्षा, नवीन कायदे व कायद्यातील बदल यावर मार्गदर्शन करण्यात आले. आपत्कालीन हेल्पलाईन क्रमांक 112, 1091 व 1098 यांची माहिती देत त्यांचा योग्य वापर कसा करावा, हेही समजावून सांगण्यात आले.
कार्यक्रमादरम्यान विद्यार्थ्यांनी मोठ्या उत्साहाने सहभाग नोंदवला. प्रश्नोत्तर सत्रातून विद्यार्थ्यांच्या विविध शंका दूर करण्यात आल्या. या उपक्रमामुळे कायद्याविषयीची भीती कमी होऊन पोलीस व नागरिक यांच्यातील विश्वास अधिक दृढ होण्यास निश्चितच मदत होणार असल्याचे मत उपस्थितांनी व्यक्त केले.
हा जनजागृती कार्यक्रम वणी पोलीस स्टेशनचे प्रभारी अधिकारी पोलीस निरीक्षक गोपाल उंबरकर यांच्या मार्गदर्शनाखाली पार पडला. यावेळी सहाय्यक पोलीस निरीक्षक प्रियंका चौधरी, सहायक पोलीस निरीक्षक कपिल पाटील, पीएसआय सुदाम आसोरे, पीएसआय अंकुश वडतकर, पीएसआय शुभम महानवर तसेच पोलीस हेडकॉन्स्टेबल कावळे, पोलीस कॉन्स्टेबल शाम राठोड व इमरान खान आदी अधिकारी व कर्मचारी उपस्थित होते.
