सिटी हब मिडिया वणी…
वणीमध्ये भाजप शहराध्यक्ष ॲड. निलेश चौधरी यांची नगरपरिषद निर्णयप्रक्रियेत निर्णायक भूमिका…
सूत्रांकडून मिळालेल्या माहितीनुसार, वणी शहरात भारतीय जनता पक्षाचा पक्षाचा चेहरा म्हणून शहराध्यक्ष ॲड. निलेश चौधरी यांची भूमिका अधिक ठळक करण्यात आली आहे. नगराध्यक्ष, उपाध्यक्ष, नगरसेवक, गटनेते तसेच विविध समित्यांचे सभापती असोत—नगरपालिकेतील सर्व महत्त्वाच्या निर्णयांमध्ये ॲड. निलेश चौधरी यांच्या मताला प्राधान्य दिले जाणार असल्याचे चित्र स्पष्ट होत आहे.
यासंदर्भात भाजपचे जिल्हाध्यक्ष प्रफुल चव्हाण व माजी जिल्हाध्यक्ष नितीन भुतडा यांनी नगराध्यक्ष, उपाध्यक्ष व सर्व नगरसेवकांना स्पष्ट सूचना दिल्याचेही सूत्रांकडून सांगण्यात येत आहे. नगरपालिकेत मांडले जाणारे ठराव, विकासकामांचे प्रस्ताव तसेच धोरणात्मक निर्णय हे ॲड. निलेश चौधरी यांच्या सल्ल्यानेच घ्यावेत, असे निर्देश देण्यात आल्याची माहिती आहे.
संघटन प्रमुख म्हणून कार्यरत असलेले ॲड. निलेश चौधरी हे वणीतील भाजप संघटनेचा प्रमुख चेहरा असून संघटनात्मक बांधणी व शिस्तबद्ध कार्यपद्धतीमुळे त्यांची स्वतंत्र ओळख निर्माण झाली आहे. पक्षाचे वरिष्ठ नेते माजी आमदार संजीव रेड्डी बोदकुरवार व इतर वरिष्ठ नेत्यांच्या मार्गदर्शनाखाली वणी शहरातील भाजपचा संघटनात्मक चेहरा म्हणून ॲड. निलेश चौधरी असतील, असे सूत्रांकडून स्पष्ट केले आहे.
माजी आमदार संजीव रेड्डी बोदकुरवार यांच्या मार्गदर्शनाखाली ॲड. निलेश चौधरी यांनी आपल्या नियोजनबद्ध रणनीतीने, प्रभावी संघटन कौशल्याने आणि सुनियोजित प्रचारामुळे नगरपरिषद निवडणूक भाजपच्या बाजूने खेचून आणली. त्यांच्या या कामगिरीचे सर्व स्तरांतून कौतुक होत असून पक्षाच्या वरिष्ठ नेतृत्वाची मर्जीही त्यांना लाभत असल्याची चर्चा राजकीय वर्तुळात आहे.
यामुळेच येत्या काळात ॲड. निलेश चौधरी यांच्यावर आणखी मोठ्या जबाबदाऱ्या सोपवण्यात येण्याची शक्यता व्यक्त केली जात आहे. तसेच माजी आमदार संजीव रेड्डी बोदकुरवार व ॲड. निलेश चौधरी यांची जोडी वणी शहराच्या विकासासाठी उपयुक्त ठरणार असून, ही जोडी वणीकरण व शहराच्या सर्वांगीण प्रगतीसाठी फायदेशीर ठरेल, असे राजकीय वर्तुळात मानले जात आहे.
