सिटी हब मिडिया वणी…
१६ वर्षांनंतर वणीत दंगल कुस्तीचा जल्लोष,
महिला व पुरुष गटात ‘माजी आमदार केसरी दंगल कुस्ती’**
वणी शहराची सांस्कृतिक व क्रीडापर परंपरा जपणाऱ्या श्री रंगनाथ स्वामी यात्रोत्सवानिमित्त यावर्षी खेळप्रेमींसाठी एक मोठी आनंदाची बातमी असून, तब्बल १६ वर्षांनंतर भव्य दंगल कुस्तीचे आयोजन करण्यास एकमताने मंजुरी देण्यात आली आहे. यावर्षी ही दंगल कुस्ती महिला व पुरुष अशा दोन्ही गटांत भरविण्यात येणार असून, त्यामुळे कुस्तीप्रेमींमध्ये मोठा उत्साह निर्माण झाला आहे.
शनिवारी (७ फेब्रुवारी) सायंकाळी ५ वाजता श्री रंगनाथ स्वामी मंदिरात झालेल्या बैठकीत यावर्षी दंगल कुस्त्या भरविण्याचा सर्वानुमते निर्णय घेण्यात आला. या दंगल कुस्त्या माजी आमदार संजीव रेड्डी बोदकुरवार पुरस्कृत ‘माजी आमदार केसरी दंगल कुस्ती’ या नावाने आयोजित करण्यात येणार आहेत.
या दंगल कुस्त्यांसाठी पैलवान पांडुरंग लांजेवार यांनी पुढाकार घेतला असून, त्यांच्या या प्रयत्नाला कुस्तीप्रेमी, पैलवान व विविध सामाजिक घटकांकडून उत्स्फूर्त प्रतिसाद मिळत आहे. विशेष बाब म्हणजे, यंदा महिला गटातील दंगल कुस्त्यांनाही स्वतंत्र व मानाचे व्यासपीठ देण्यात येणार असल्याने महिलांच्या क्रीडाशक्तीला चालना मिळणार आहे.
दरम्यान, पुरुष गटातील विजेत्या पैलवानास पारंपरिक ‘गदा’ बक्षीस म्हणून प्रदान करण्यात येणार असून, त्यामुळे दंगल कुस्ती अधिक रंगतदार व स्पर्धात्मक ठरण्याची शक्यता आहे.
दंगल कुस्त्यांची नेमकी तारीख व आयोजनस्थळ अद्याप निश्चित करण्यात आले नसून, याबाबतचा अंतिम निर्णय पुढील बैठकीत घेतला जाणार असल्याची माहिती आयोजकांनी दिली.
या बैठकीस पांडुरंग लांजेवार, सुरेंद्र ईखारे, प्रमोद निकुरे, फारुख रंगरेज, इरफान शेख, शेख अकील, अशोक निकुरे, मोरेश्वर बरडे, विठ्ठल चौधरी, बंडु निंदेकर, बाबुलाल पोटदुखे, जहिर शेख, दिलीप खाडे, संतोष जोशी, सूर्यकांत मोरे, जॉन पोन्नलवार, अजय बोबडे, विजय थेरे, रमेश शर्मा, प्रा. दिलीप मालेकर, सुरेश रायपुरे, संदीप जयस्वाल, रमेश बावणे, कनैया पारखी, रमेश येरणे, दिपक पचारे, सुदामा सादवानी, परशुराम पोटे, महादेव दोडके यांच्यासह मोठ्या संख्येने कुस्तीप्रेमी व मान्यवर उपस्थित होते.
महिला व पुरुष दोन्ही गटांत होणाऱ्या या दंगल कुस्त्यांमुळे वणीतील कुस्ती परंपरेला नवी ऊर्जा मिळणार असून, यंदाचा यात्रोत्सव खेळप्रेमींसाठी अविस्मरणीय ठरणार आहे.
