सिटी हब मिडिया वणी…
शास्त्रीनगर परिसरातील एका ३० वर्षीय तरुणाने शेजारी राहणाऱ्या अल्पवयीन मुलाला अश्लील कृत्य करण्यास प्रवृत्त केल्याची धक्कादायक घटना उघडकीस आली आहे. याप्रकरणी वणी पोलिसांनी तत्परतेने पावले उचलत आरोपीला बेड्या ठोकल्या असून, न्यायालयाने त्याची रवानगी कारागृहात केली आहे.
घटनेचा थरार…
मिळालेल्या माहितीनुसार, फिर्यादी हे आपल्या अल्पवयीन मुलासह घरात झोपलेले असताना, मुलाने त्यांच्यासोबत अयोग्य वर्तन केले. या प्रकाराने अवाक झालेल्या पालकांनी जेव्हा मुलाला विश्वासात घेऊन विचारणा केली, तेव्हा धक्कादायक वास्तव समोर आले. शेजारी राहणाऱ्या ‘अक्षय मामा’ नावाच्या व्यक्तीने आपल्याला अशा प्रकारचे अनैतिक आणि अश्लील कृत्य करण्यास शिकवले व प्रवृत्त केले, अशी कबुली मुलाने दिली.
पोलिसांची तात्काळ कारवाई
घटनेचे गांभीर्य ओळखून फिर्यादींनी तातडीने ‘डायल ११२’ वर संपर्क साधला. माहिती मिळताच वणी पोलिसांनी घटनास्थळ गाठले. याप्रकरणी आरोपी आकाश उर्फ अक्षय अरुण वांढरे (वय ३० वर्षे, रा. शास्त्रीनगर, वणी) याच्याविरुद्ध वणी पोलीस ठाण्यात विविध कलमान्वये गुन्हा दाखल करण्यात आला आहे.
दाखल गुन्ह्याची कलमे:
भारतीय न्याय संहिता (BNS): कलम ६५ (२)
पोक्सो (POCSO) कायदा: कलम ४, ५ (L)(M)(N), ६ आणि १०
आरोपीला जेलची हवा
पोलीस तपासादरम्यान आरोपीला त्वरित अटक करण्यात आली. अटकेनंतर त्याला न्यायालयात हजर केले असता, न्यायालयाने त्याची रवानगी न्यायालयीन कोठडीत (तुरुंगात) करण्याचे आदेश दिले आहेत.
सदर कारवाई वरिष्ठ पोलीस अधिकाऱ्यांच्या मार्गदर्शनाखाली करण्यात आली असून, प्रकरणाचा अधिक तपास सहाय्यक पोलीस निरीक्षक प्रियंका चौधरी करीत आहेत.
