सिटी हब मिडिया वणी…
एक हृदयद्रावक घटनेत वणी येथील एका २५ वर्षीय तरुणाचा मालगाडीखाली चिरडून जागीच मृत्यू झाला. ही घटना शुक्रवारी मध्यरात्री वणी-माजरी रेल्वे मार्गावरील नायगाव गावाजवळ घडली. अद्वैत विजय माळीकर (राहणार विद्या नगरी, नांदेपरा रोड, वणी) असे मृत तरुणाचे नाव असून, तो वणी बस स्थानकासमोर चहाची टपरी चालवून आपला उदरनिर्वाह करत होता.
नेमकी घटना काय?
मिळालेल्या माहितीनुसार, शुक्रवारी रात्री १२:३० च्या सुमारास चंद्रपूर येथील वीज प्रकल्पासाठी कोळसा घेऊन जाणारी मालगाडी नायगाव रेल्वे फाटकाजवळून जात होती. यावेळी अद्वैत अचानक रेल्वे रुळावर आला आणि मालगाडीने त्याला जोरदार धडक दिली. या भीषण अपघातात तो गाडीखाली आल्याने त्याचा घटनास्थळीच मृत्यू झाला.
कुटुंब उपचारासाठी नागपूरला गेले असताना काळाचा घाला…
अद्वैतचे वडील शिक्षक आहेत. विशेष म्हणजे, घटनेच्या दिवशी त्याचे कुटुंबीय मोठ्या मुलाच्या उपचारासाठी नागपूरला गेले होते. अद्वैत मध्यरात्री इतक्या लांब रेल्वे रुळांजवळ का गेला होता, याबाबत अद्याप गूढ कायम आहे.
पोलीस तपास सुरू…
घटनेची माहिती मिळताच लोको पायलटने तात्काळ गाडी थांबवून वणी रेल्वे स्टेशन मास्टरला सूचित केले. त्यानंतर रेल्वे पोलीस (RPF) आणि वणी पोलिसांनी घटनास्थळी धाव घेत पंचनामा केला. मृतदेह उत्तरीय तपासणीसाठी ग्रामीण रुग्णालयात पाठवण्यात आला आहे.
अपघात की आत्महत्या? हा अपघात रेल्वे रूळ ओलांडताना झाला की अद्वैतने आत्महत्येचा प्रयत्न केला, हे अद्याप स्पष्ट झालेले नाही. सहायक पोलीस निरीक्षक अंकुश वडतकर या प्रकरणाचा पुढील तपास करत आहेत.
या घटनेमुळे माळीकर कुटुंबावर दुःखाचा डोंगर कोसळला असून वणी परिसरात हळहळ व्यक्त केली जात आहे.
बातमीत एआई ईमेज वापली आहे…
