सिटी हब मिडिया वणी…
राज्यातील आगामी राजकीय समीकरणे आणि पक्ष विस्ताराच्या पार्श्वभूमीवर, वणी येथील खंबीर नेतृत्व आणि काँग्रेसचे प्रदेश सचिव संजय खाडे यांच्यावर पक्षाने मोठी जबाबदारी सोपवली आहे. अचलपूर विधानसभा मतदारसंघात पक्ष संघटनेसाठी त्यांनी केलेल्या कष्टाचे फळ म्हणून आता त्यांच्याकडे पूर्व नागपूर विधानसभा मतदारसंघाच्या प्रभारीपदाची धुरा देण्यात आली आहे.
प्रदेशाध्यक्ष हर्षवर्धन सपकाळ यांच्या सूचनेनुसार ही नियुक्ती करण्यात आली असून, खाडे यांच्याकडे आधीच असलेल्या प्रदेश सचिव पदासोबत आता या नव्या आव्हानाची भर पडली आहे.
अचलपूरमधील यशानंतर ‘नागपूर मिशन’
संजय खाडे यांनी अचलपूर मतदारसंघात ग्रामीण स्तरावर जाऊन कार्यकर्त्यांची मोट बांधली होती. त्यांच्या याच अनुभवाचा फायदा आता नागपूर शहरात घेण्याचा पक्षाचा मानस आहे. शेतकरी आणि कामगारांचे नेते म्हणून त्यांची असलेली ओळख नागपूर पूर्वमधील कामगार वर्ग आणि सर्वसामान्यांशी नाळ जोडण्यासाठी उपयुक्त ठरेल, असा विश्वास पक्षश्रेष्ठींनी व्यक्त केला आहे.
पूर्व नागपूरचे महत्त्व
नागपूर पूर्व हा मतदारसंघ राजकीयदृष्ट्या अतिशय संवेदनशील आणि महत्त्वाचा मानला जातो. एकेकाळी काँग्रेसचा भक्कम गड राहिलेल्या या भागात पुन्हा एकदा चैतन्य निर्माण करण्याचे आव्हान खाडे यांच्यासमोर असेल. व्यापारी, तरुण वर्ग आणि विविध समाजघटकांचे प्राबल्य असलेल्या या क्षेत्रात समन्वयाची भूमिका बजावण्यासाठी खाडे यांची निवड निर्णायक मानली जात आहे.
“पक्षश्रेष्ठींनी अचलपूरमधील माझ्या कामाची दखल घेऊन ही मोठी जबाबदारी दिली आहे, याचा आनंद आहे. स्थानिक नेते, पदाधिकारी आणि कार्यकर्त्यांना सोबत घेऊन पूर्व नागपूरमध्ये काँग्रेसला पुन्हा गतवैभव मिळवून देण्यासाठी मी कटिबद्ध आहे. जनसंपर्क आणि संघटनात्मक बांधणी हेच माझे मुख्य उद्दिष्ट राहील.” — संजय खाडे, प्रदेश सचिव व प्रभारी, पूर्व नागपूर.
कार्यकर्त्यांमध्ये उत्साहाचे वातावरण
संजय खाडे यांनी आपल्या या यशाचे श्रेय प्रदेशाध्यक्ष हर्षवर्धन सपकाळ, खा. प्रतिभा धानोरकर आणि जिल्ह्यातील वरिष्ठ नेत्यांना दिले आहे. त्यांच्या या नव्या नियुक्तीमुळे वणीसह विदर्भातील काँग्रेस कार्यकर्त्यांमध्ये आनंदाचे वातावरण असून, नागपूर पूर्वमध्ये पक्षाला नवी उभारी मिळेल, अशी अपेक्षा व्यक्त केली जात आहे.
