सुनिल तुगनायत,सिटी हब मिडिया वणी…
शहरात गेल्या काही दिवसांपासून घरगुती आणि व्यावसायिक गॅस सिलेंडरचा मोठा तुटवडा भासत असून, हा प्रकार नैसर्गिक नसून ‘कृत्रिम’ असल्याचा आरोप आता जोर धरू लागला आहे. या गंभीर प्रश्नावर शिवसेना (उद्धव बाळासाहेब ठाकरे) पक्षाने आक्रमक पवित्रा घेत थेट उपविभागीय अधिकाऱ्यांच्या दारात धडक दिली. “७ दिवसांत परिस्थिती न सुधारल्यास तीव्र आंदोलन छेडू,” असा स्पष्ट इशारा शिवसेनेने प्रशासनाला दिला आहे.
नेमका प्रश्न काय?
वणी शहरात एच.पी. आणि इंडियन गॅसच्या वितरकांकडून ग्राहकांची अडवणूक होत असल्याच्या तक्रारी वाढल्या आहेत. शिवसेनेच्या निवेदनानुसार:
काळाबाजार: सिलेंडरची साठेबाजी करून ते चढ्या दराने विकले जात आहेत.
वितरण ठप्प: हक्काची ‘होम डिलिव्हरी’ बंद असल्याने सर्वसामान्यांना पायपीट करावी लागत आहे.
आर्थिक लूट: टंचाईचे कारण सांगून ग्राहकांकडून अतिरिक्त पैसे उकळले जात आहेत.
शिवसेनेच्या प्रमुख मागण्या:
१. गॅस सिलेंडरचा काळाबाजार तात्काळ रोखण्यात यावा.
२. विस्कळीत झालेली घरपोच सेवा पुन्हा पूर्ववत सुरू करावी.
३. नियमबाह्य काम करणाऱ्या आणि कृत्रिम टंचाई निर्माण करणाऱ्या वितरकांवर कठोर कायदेशीर कारवाई व्हावी.
सोशल मीडियावरून जनरेटा…
या आंदोलनात वणी विधानसभा सोशल मीडिया प्रमुख साकेत अविनाश भुजबलराव यांनी महत्त्वाची भूमिका बजावली. त्यांनी डिजिटल माध्यमातून नागरिकांच्या तक्रारींना वाचा फोडत प्रशासनावर दबाव निर्माण केला. आमदार संजय भाऊ देरकर आणि जिल्हाप्रमुख संजय भाऊ निखाडे यांच्या मार्गदर्शनाखाली हे निवेदन देण्यात आले…
उपस्थित पदाधिकारी…
निवेदन देतेवेळी शहर सचिव अजय चन्ने, उपशहर प्रमुख राजू पाटील, शहर संघटक मनीष बत्रा, नगरपरिषदेचे गटनेते सुधीर थेरे, नगरसेवक अनिकेत बदखल, शत्रुघन मालेकर, तुलसी तोवर यांच्यासह युवासेना व शिवसेनेचे असंख्य शिवसैनिक मोठ्या संख्येने उपस्थित होते.
पुढील पाऊल काय असेल?
दिलेली ७ दिवसांची मुदत संपल्यानंतरही जर सिलेंडर वितरण सुरळीत झाले नाही, तर वणी शहरात मोठे जनआंदोलन उभे राहण्याची शक्यता आहे.
