सुनिल तुगनायत, सिटी हब मिडिया वणी…
शहरातील अवैध धंद्यांचे समूळ उच्चाटन करण्यासाठी वणी पोलिसांनी कंबर कसली असून, गेल्या आठवडाभरात विविध ठिकाणी धाडी टाकून जुगार खेळणाऱ्यांवर मोठी कारवाई केली आहे. १३ एप्रिल ते १८ एप्रिल २०२६ या कालावधीत करण्यात आलेल्या या मोहिमेमुळे अवैध धंदेवाल्यांचे धाबे दणाणले आहेत.
या परिसरात झाली कारवाई…
पोलीस प्रशासनाने मिळालेल्या गुप्त माहितीच्या आधारे शहरातील खालील मुख्य भागात ही धडक मोहीम राबवली:
भाजी मंडी परिसर
खाती चौक
ज्योती बार समोरील मार्ग
लालगुडा परिसर
कारवाईचा तपशील…
लपून-छपून चालणाऱ्या या जुगार अड्ड्यांवर पोलिसांनी छापा मारला असता, एकूण ०५ गुन्हे दाखल करण्यात आले आहेत. या मोहिमेदरम्यान पोलिसांनी ३१,६२० रुपयांचा मुद्देमाल जप्त केला असून संबधितांवर जुगार कायद्यांतर्गत कडक कायदेशीर पाऊले उचलली आहेत.
“शहरातील शांतता व सुव्यवस्था अबाधित राखण्यासाठी अवैध धंद्यांविरुद्धची ही मोहीम यापुढेही अधिक तीव्र केली जाईल. नागरिकांनी आपल्या परिसरात कुठेही असा प्रकार सुरू असल्याचे आढळल्यास तात्काळ पोलिसांना माहिती देऊन सहकार्य करावे.”
पोलीस निरीक्षक, पोलीस स्टेशन वणी…
पोलिसांचा कडक इशारा…
विशेष पथकांच्या माध्यमातून पोलीस सध्या शहरात बारीक नजर ठेवून आहेत. माहिती संकलनाचे काम वेगाने सुरू असून, आगामी काळात अशा अवैध कृत्यांमध्ये गुंतलेल्या व्यक्तींवर कठोर कारवाई करण्याचे संकेत पोलीस विभागाने दिले आहेत. नागरिकांच्या सहकार्याने शहर ‘गुन्हेमुक्त’ करण्याचा मानस वणी पोलिसांनी व्यक्त केला आहे.
