सुनिल तुगनायत, सिटी हब मिडिया वणी…
वणी परिसरात अवैध गोवंश तस्करीचे सत्र जोरात सुरू असल्याचे चित्र असून, गेल्या काही दिवसांत पोलिसांनी विविध ठिकाणी धाडी टाकून मोठी कारवाई केली आहे. महाराष्ट्र प्राणी संरक्षण अधिनियमांतर्गत एकूण ४ वेगवेगळ्या गुन्ह्यांची नोंद करण्यात आली असून, यामध्ये ७ लाख ५० हजारांची वाहने आणि सुमारे ९४,००० रुपये किमतीचा गोवंश असा एकूण ८ लाख ४४ हजार रुपयांचा मुद्देमाल जप्त करण्यात आला आहे.
पहिली कारवाई: मोहुर्ली गावाजवळ ३ वाहने पकडली…
दिनांक २८ एप्रिल रोजी सकाळी मोहर्ली गावाजवळ पोलिसांनी नाकाबंदी दरम्यान तीन संशयास्पद वाहने अडवली. यामध्ये टाटा एस (MH 29 T 4284), टाटा एस (MH 34 BG 1505) आणि अशोक लेलँड (MH 34 CQ 1573) या वाहनांचा समावेश होता. या वाहनांमध्ये ३ बैल आणि ४ गोऱ्हे अशा एकूण ७ जनावरांना क्रूरपणे पाय बांधून कोंबण्यात आले होते. याप्रप्रकरणी चालक युवराज तुराणकर (नायगाव), सुनील आसुटकर (वरोरा) आणि अभय उईके (चंद्रपूर) यांच्यावर गुन्हा दाखल करण्यात आला आहे.
दुसरी कारवाई: वणी रेल्वे क्रॉसिंगवर टाटा इंट्रा जप्त…
३ मे रोजी दुपारी १५:३० च्या सुमारास मोहर्लीकडून वणीकडे येणाऱ्या मार्गावर रेल्वे क्रॉसिंगजवळ पोलिसांनी कारवाई केली. टाटा इंट्रा (MH 29 BE 7138) या वाहनातून १ बैल आणि २ गोऱ्हे यांची अवैध वाहतूक करताना जिब्राण शेख अखिल (वणी) आणि पुणाजी मेश्राम (मोहुर्ली) या दोघांना ताब्यात घेण्यात आले. जनावरांच्या चारा-पाण्याची कोणतीही सोय न करता त्यांची छळवणूक केली जात असल्याचे निदर्शनास आले.
तिसरी कारवाई: ड्रीम लॅन्ड सिटी परिसरात मध्यरात्री धाड…
५ मे रोजी पहाटे ३:०० वाजेच्या सुमारास मुर्धोनी रोडवरील ड्रीम लॅन्ड सिटी परिसरात पोलिसांनी सापळा रचून टाटा इंट्रा (MH 29 BE 6904) हे वाहन पकडले. या वाहनात १५ हजार रुपये किमतीचे दोन मोठे बैल आढळून आले. या प्रकरणी राजू रामगोपाल गुप्ता (वणी), अनिल कैलास खैरे (भद्रावती) आणि शेख रिझवान (वणी) यांच्यावर गुन्हा नोंदवण्यात आला आहे.
चौथी कारवाई: संविधान चौकात ८ आरोपींना अटक…
५ मे रोजी सकाळी ६:३० वाजता वरोरा रोडवरील संविधान चौक येथे मोठी कारवाई करण्यात आली. यामध्ये ४ वाहने (MH 34 BG 4642, MH 33 G 2275, MH 34 AB 4853, MH 34 BZ 0024) जप्त करण्यात आली. या वाहनांमध्ये कानाला टॅग असलेले शासकीय नोंदणीकृत बैल आणि गोऱ्हे क्रूरपणे नेले जात होते. या प्रकरणी प्रथमेश बोरतवार, रामदास रागीट, शंकर झाडे, शरद चटकी, नंदकिशोर डोळस, लक्ष्मण घागी, गणेश दातारकर आणि अमित कसारे अशा एकूण ८ जणांवर गुन्हा दाखल करण्यात आला आहे.
महत्त्वाचे मुद्दे:
एकूण जप्त गोवंश: १४ हून अधिक बैल आणि गोऱ्हे.
कारवाईचे ठिकाण: मोहुर्ली, रेल्वे क्रॉसिंग, मुर्धोनी रोड आणि संविधान चौक, वणी.
कायदेशीर कारवाई: सर्व आरोपींवर ‘प्राण्यांचा छळ प्रतिबंधक अधिनियम १९६०’ आणि ‘महाराष्ट्र प्राणी संरक्षण अधिनियम’ अंतर्गत गुन्हे दाखल.
वणी पोलिसांनी केलेल्या या सलग कारवायांमुळे गोवंश तस्करांचे धाबे दणाणले आहेत. या प्रकरणाचा पुढील तपास वणी पोलीस करत आहेत.
