सुनिल तुगनायत, सिटी हब मिडिया वणी…
शहरातील अवैध धंद्यांचे समूळ उच्चाटन करण्यासाठी वणी पोलीस प्रशासन आता ॲक्शन मोडमध्ये आले आहे. गेल्या काही दिवसांत पोलिसांनी गुप्त माहितीच्या आधारे लालगुडा चौफुली आणि ज्योती बार गल्ली परिसरात सुरू असलेल्या लपून-छपून जुगार अड्ड्यांवर धाडी टाकून मोठी कारवाई केली आहे.
दोन वेगवेगळ्या कारवायांत चौघे जाळ्यात…
दिनांक २४ एप्रिल आणि ८ मे २०२६ रोजी पोलिसांनी विशेष मोहीम राबवली होती. या कारवाईदरम्यान जुगार खेळताना आणि खेळवताना आढळलेल्या चार संशयितांविरुद्ध महाराष्ट्र जुगार कायद्यांतर्गत गुन्हे दाखल करण्यात आले आहेत.
कारवाई करण्यात आलेल्या आरोपींची नावे:
गोपी किसन लोणारे (रा. रामपुरा वार्ड, वणी)
अमित किसन घेडांगे (रा. भाग्यशाली नगर, वणी)
मंगेश बबन बदखल (रा. भालर)
अजय बलेश्वर मांझी (रा. रंगनाथ नगर, वणी)
नगदी मुद्देमाल जप्त…
पोलिसांनी या छाप्यात जुगाराच्या साहित्यासह एकूण ७,१६० रुपये रोख जप्त केली आहे. पोलीस निरीक्षकांच्या मार्गदर्शनाखाली विशेष पथकांनी ही कामगिरी फत्ते केली.
“शहरातील अवैध धंदे पूर्णपणे बंद करणे हे आमचे मुख्य उद्दिष्ट आहे. अशा कारवाया यापुढेही अधिक तीव्र केल्या जातील. नागरिकांनी आपल्या परिसरात कुठेही बेकायदेशीर प्रकार घडत असल्यास न घाबरता पोलिसांना माहिती देऊन सहकार्य करावे.”–गोपाळ उंबरकर, पोलीस निरीक्षक, वणी पोलीस स्टेशन…
या कारवाईमुळे वणीतील अवैध धंदे चालवणाऱ्यांचे धाबे दणाणले असून, पोलिसांच्या या भूमिकेचे सर्वसामान्य नागरिकांकडून स्वागत होत आहे.
