सुनिल तुगनायत, सिटी हब मिडिया वणी…
घराकडे पायी जात असलेल्या एका सुरक्षा रक्षकाला अडवून, त्याला जबरदस्तीने दुचाकीवर बसवण्याचा प्रयत्न केल्याची धक्कादायक घटना वणी येथील जत्रा मैदान परिसरात उघडकीस आली आहे. आरोपीच्या सांगण्यानुसार दुचाकीवर बसण्यास नकार दिल्याचा राग मनात धरून दोन जणांनी या सुरक्षा रक्षकाला लाठ्या-काठ्यांनी आणि बुक्क्यांनी बेदम मारहाण केली. या हल्ल्यात पीडित व्यक्ती गंभीर जखमी झाली आहे.
रामपुरा वॉर्ड येथील रहिवासी असलेले रवी राजेश घुगरे (वय ३१) हे अकोला को-ऑपरेटिव्ह अर्बन बँकेत सुरक्षा रक्षक (सिक्युरिटी गार्ड) म्हणून कार्यरत आहेत. मंगळवारी (१४ जुलै) नेहमीप्रमाणे आपली ड्युटी संपवून ते रंगारीपुरा येथे राहणाऱ्या आपल्या बहिणीकडे जेवणासाठी गेले होते. रात्री साडेदहाच्या सुमारास जेवण आटोपून ते पायी आपल्या घराकडे निघाले होते.
ते जत्रा मैदान परिसराजवळ पोहोचले असता, मैलगडा येथील रहिवासी असलेल्या आकाश (वय अंदाजे २८ वर्षे) नावाच्या युवकासोबत त्यांची गाठ पडली. आकाशने रवी यांना जबरदस्तीने आपल्या मोटारसायकलवर बसण्याचा आग्रह केला. मात्र, रवी यांनी त्याला स्पष्ट नकार दिला.
लाठ्या-काठ्यांनी हल्ला अन् जीवे मारण्याची धमकी:
नकार ऐकताच संतप्त झालेल्या आकाश आणि त्याच्यासोबत असलेल्या एका अनोळखी मित्राने वाद घालण्यास सुरुवात केली. रागाच्या भरात दोघांनी हातातील काठीने रवी यांच्या तोंडावर आणि पायावर सपासप वार केले. इतकेच नव्हे तर त्यांना खाली पाडून लाथाबुक्क्यांनीही मारहाण केली.या गंभीर मारहाणीमुळे रवी यांच्या तोंडातून मोठ्या प्रमाणावर रक्तस्त्राव सुरू झाला.
मारहाणीदरम्यान रवी यांनी आरडाओरडा केल्याने त्यांचे काही मित्र धावत घटनास्थळी आले आणि त्यांनी मध्यस्थी करत भांडण सोडवले. यावेळी आरोपी आकाशने, “जर या प्रकरणाची पोलिसात तक्रार केली, तर तुला जीवे मारून टाकेन,” अशी थेट धमकी दिली.
दोन जणांवर गुन्हा दाखल:
घटनेनंतर जखमी रवी घुगरे यांना तातडीने उपचारासाठी वणी येथील ग्रामीण रुग्णालयात दाखल करण्यात आले. उपचार पूर्ण झाल्यानंतर त्यांनी वणी पोलीस ठाणे गाठून घटना सांगितली.
रवी यांच्या तक्रारीवरून वणी पोलिसांनी आरोपी आकाश आणि त्याच्या अज्ञात साथीदाराविरुद्ध भारतीय न्याय संहिता (BNS) च्या कलम ११५(२), ११८(१), ३५१(२), ३५१(३) आणि ३(५) अंतर्गत गुन्हा नोंदवला आहे. या प्रकरणाचा पुढील तपास वणी पोलीस करत आहेत.
(बातमीत एआई इमेज वापरली आहे…)
