सुनिल तुगनायत, सिटी हब मिडिया वणी…
शहरातील पुस्तकप्रेमींसाठी एक आनंदाची बातमी समोर येत आहे. स्थानिक नगर वाचनालयाच्या पुढाकाराने उद्या, बुधवार (११ नोव्हेंबर) रोजी सायंकाळी ६:३० वाजता एका दिमाखदार ‘दिवाळी अंक प्रदर्शना’चा शुभारंभ होत आहे. नगर परिषदेच्या अध्यक्षा विद्याताई सचिन आत्राम यांच्या शुभहस्ते या साहित्यिक उपक्रमाची सुरुवात केली जाईल. या सोहळ्याच्या अध्यक्षपदाची धुरा वाचनालयाचे अध्यक्ष तथा माजी आमदार संजीवरेड्डी बोदकुरवार सांभाळणार असून, नगर परिषदेचे उपाध्यक्ष राकेश बुग्गेवार यांची प्रमुख उपस्थिती लाभणार आहे.
अंकांची रेलचेल अन् विषयांचे वैविध्य… राज्यभरातील ख्यातनाम लेखकांच्या लेखणीने सजलेले अनेक दर्जेदार दिवाळी अंक या प्रदर्शनाचे मुख्य आकर्षण ठरतील. वाचकांची आवड लक्षात घेऊन गूढकथा, हास्य-विनोद, ललित साहित्य, पाककला, अध्यात्म, भ्रमंती, आरोग्य, चित्रपटविश्व, भविष्य आणि विशेषतः महिला जगताशी संबंधित अशा नानाविध विषयांवर आधारित अंकांचा खजिना येथे मांडला जाणार आहे. यामुळे सर्व वयोगटांतील वाचकांना आपल्या आवडीनुसार पुस्तकांची निवड करता येईल.
वाचनसंस्कृती वृद्धिंगत करण्याचा संकल्प… मराठी साहित्याचा अनमोल वारसा नव्या पिढीपर्यंत पोहोचवणे आणि समाजात वाचनाची गोडी टिकवून ठेवणे, हा या आयोजनामागचा मूळ हेतू आहे. वणी शहर व परिसरातील सर्व साहित्यप्रेमी नागरिकांनी मोठ्या संख्येने उपस्थित राहून या वाचन महोत्सवाचा लाभ घ्यावा, अशी विनंती नगर वाचनालय व्यवस्थापनातर्फे करण्यात आली आहे.

























