सुनिल तुगनायत, सिटी हब मिडिया वणी…
चिखलगाव ग्रामपंचायत हद्दीतील लालपुलिया परिसरात रस्त्यावर तासनतास उभ्या राहणाऱ्या अवजड ट्रकांमुळे वाहतुकीची मोठी कोंडी निर्माण होत असून अपघाताचा धोका कमालीचा वाढला आहे. याप्रकरणी वाहतूक विभाग आणि प्रादेशिक परिवहन विभागाने (RTO) तातडीने हस्तक्षेप करून कारवाई करावी, अन्यथा तीव्र लोकशाही मार्गाने आंदोलन छेडण्यात येईल, असा इशारा स्थानिक ग्रामस्थांनी दिला आहे.
याबाबत मनोज नवले, निलेश सोनटक्के यांच्यासह चिखलगाव येथील ग्रामस्थांनी उपप्रादेशिक परिवहन अधिकारी (यवतमाळ) व उपविभागीय पोलिस अधिकारी (वणी) यांना निवेदन सादर केले आहे.
निवेदनातील मुख्य मुद्दे व मागण्या:
नागरिकांची दैनंदिन घुसमट: रस्त्याच्या दुतर्फा अथवा मधोमध उभ्या राहणाऱ्या ट्रकांमुळे शाळकरी मुले, ज्येष्ठ नागरिक, शेतकरी आणि इतर वाहनधारकांना ये-जा करताना मोठा मनस्ताप सहन करावा लागत आहे.
अपघातांचे सत्र व जीवघेणा प्रवास: अनेक ठिकाणी दुभाजकांचा (डिव्हायडर) वापर टाळून अवजड वाहने उभी केली जातात. त्यामुळे वळणावर समोरून येणारे वाहन न दिसल्याने अपघात घडत आहेत. नोव्हेंबर २०२५ मध्ये याच निष्काळजीपणामुळे चिखलगाव येथील ‘मेधधूत’ परिसरातील एका महिलेचा दुर्दैवी मृत्यू झाला होता, याची आठवण ग्रामस्थांनी करून दिली आहे.
प्रशासकीय उदासीनता: या समस्येकडे वारंवार लक्ष वेधूनही संबंधित यंत्रणांकडून कोणतीही ठोस उपाययोजना करण्यात आलेली नाही. यामुळे नागरिकांमध्ये तीव्र असंतोष पसरला आहे.
८ दिवसांचा अल्टिमेटम:
प्रशासनाने येत्या ८ दिवसांच्या आत रस्त्यावरील हे बेकायदेशीर ट्रक हटवून संबंधित ट्रान्सपोर्ट धारकांवर मोटार वाहन कायद्यानुसार कठोर कारवाई करावी, अशी मागणी निवेदनात करण्यात आली आहे. मुदतीत तोडगा न निघाल्यास रस्ता रोको किंवा जनआंदोलन करण्यात येईल. या कालावधीत कोणताही अनुचित प्रकार किंवा अपघात घडल्यास त्याची सर्वस्वी जबाबदारी वाहतूक विभाग व उपप्रादेशिक परिवहन विभागाची राहील, असा इशारा निवेदनाद्वारे देण्यात आला आहे.
या निवेदनावर मनोज नवले, निलेश सोनटक्के, अमित संते, रवींद्र राऊत, धनंजय भोयर, गणपत खांडेकर आणि तुषार कांबळे यांच्यासह अनेक ग्रामस्थांच्या स्वाक्षऱ्या आहेत.
